Zakryty ŭładami pravaabarončy centr «Viasna» pryniaŭ rašeńnie viarnucca ŭ ofis na praśpiekcie Niezaležnaści, 78A. Hetuju kvateru ŭłady kanfiskavali ŭ 2011 hodzie, kali staršyni arhanizacyi Alesiu Bialackamu byŭ vyniesieny abvinavaŭčy prysud — jon źjaŭlaŭsia ŭłaśnikam kvatery. Dniami pravaabaroncy viarnulisia ŭ stary ofis i praviali tam sustreču z pradstaŭnikami Amnesty international.
Aleś Bialacki, Valancin Stefanovič, Ajša Junh, Andrej Pałuda i pradstaŭnik Amnesty International Alaksandr Arciemjeŭ padčas vizitu «Mižnarodnaj amnistyi» ŭ Minsk 25 kastryčnika 2016 hoda.
Pryčynaj praviadzieńnia sustrečy ŭ hetym miescy stała pryniataje na dniach Radaj arhanizacyi rašeńnie ab adnaŭleńni pracy ŭ hetym pamiaškańni, adznačajecca na sajcie spring96.org. U listapadzie 2012 hoda ŭsia majomaść arhanizacyi, jakaja znachodziłasia ŭ ofisie, była kanfiskavanaja i vyviezienaja sudovymi vykanaŭcami, a pamiaškańnie, jakoje da hetaha času znachodzicca pad aryštam, apiačatana.
Pravaabarončy centr «Viasna» i mižnarodnaja supolnaść nie pryznajuć zakonnaść pieraśledu Alesia Bialackaha i nastojvajuć na jaho poŭnaj reabilitacyi. U suviazi z hetym było pryniata rašeńnie vykarystać aryštavanaje i kanfiskavanaje pamiaškańnie ofisa dla pravaabarončych metaŭ.
Jak paviedamiła pradstaŭnica «Viasny» Taćciana Raviaka, arhanizacyja častkova pierajedzie ŭ kvateru na praśpiekcie Niezaležnaści, častka kamandy zastaniecca pracavać u ciapierašnim ofisie pa vulicy Miaržynskaha. U starym ofisie, akramia «Viasny», buduć pradstaŭleny «Biełaruski dakumientacyjny centr» i «Centr daśledavańnia hramadzianskaj supolnaści Biełarusi» (abiedźvie arhanizacyi zarehistravanyja ŭ Litvie).
