Biełaruś vydatkuje na arhanizacyju i praviadzieńnie II Jeŭrapiejskich hulniaŭ kala $50 młn. Pra heta Alaksandr Łukašenka zajaviŭ siońnia ŭ čas sustrečy z pracoŭnym kalektyvam AAT «Mahiloŭchimvałakno», piša BiełTA.
«My paličyli, što navat u plusie budziem. Nam treba budzie vydatkavać niedzie pad $50 młn za hetyja hady. Heta ślozy dla krainy. A moža, i taho nie treba: jeŭrapiejcy skazali, što dapamohuć», — adznačyŭ Łukašenka.
Jon rastłumačyŭ, što pierad tym jak prapanavać kandydaturu Biełarusi na praviadzieńnie hetych spabornictvaŭ, u krainie padličyli, u kolki jany abyducca. «Voś kali b skazali Alimpijskija hulni pravodzić, to tut vielizarnyja patrebnyja vydatki», — dadaŭ jon.
Kiraŭnik dziaržavy padkreśliŭ, što Biełaruś hatova pravieści II Jeŭrapiejskija hulni na suśvietnym uzroŭni. «U nas dastatkova haścinic. Kali treba budzie, zadziejničajem sanatoryi vakoł Minska, studenckija haradki», — adznačyŭ Łukašenka. Jon dadaŭ, što ŭ krainie taksama jość vialikaja kolkaść spartyŭnych abjektaŭ, viadziecca budaŭnictva stadyjona «Dynama», płanujecca ŭźviadzieńnie nacyjanalnaha futbolnaha stadyjona.
«Tak, nam chaciełasia, kab płavalny basiejn byŭ lepiej, čym u Minsku, ale jon jość u Breście, — kanstatavaŭ biełaruski lidar.— Što tyčycca rehijonaŭ, kali vy budziecie hatovyja pa niejkim vidzie sportu pravieści mierapryjemstvy, pryniać kamandy i arhanizavać turnir, kali łaska. Ci možam razhladzieć hety varyjant. Kali my nie paśpiejem pabudavać dobry płavalny basiejn, jak u Kazani, budziem, napeŭna, pravodzić u Breście».
Na pastanoŭku cyrymonii adkryćcia I Jeŭrapiejskich hulniaŭ, zaŭvažyŭ kiraŭnik dziaržavy, u Baku vydatkavali $100 młn. «U nas hetaha nie budzie. My zrobim dušeŭnaje adkryćcio, kab pakazać dušu našaha naroda. Pryhoža zrobim. Heta budzie navat mienš za $1 młn kaštavać, ale nie $100 młn», — skazaŭ Łukašenka.
Ale hałoŭnaje, padkreśliŭ jon, što praviadzieńnie takich maštabnych spabornictvaŭ pavysić imidž i paznavalnaść krainy. «Da nas pryjeduć ludzi. Jany ŭbačać našu krainu, jak i z čempijanatam śvietu pa chakiei. Što my tam stracili? Ničoha. My navat u plusie zastalisia, — zajaviŭ kiraŭnik dziaržavy. — Kali my vyrašyli być niezaležnymi i suvierennymi, treba razumieć, što heta niatanna abychodzicca. I kali atrymlivajecca z prybytkam, to na heta zaŭsiody treba iści».
