Z 1930 hodu ekanamičnyja hulni stali najbolš papularnymi nastołkami va ŭsim śviecie. Na siońniašni dzień biełaruskamoŭnych nastolnych hulniaŭ isnuje vielmi mała, i amal usie jany pradstaŭleny na symbal.by.
Aŭtary nastołki «Bahač», pačaŭšy prajekt pa zbory srodkaŭ na vydańnie hulnina płatformie Talaka.by, chočuć vyrašyć hetuju prablemu, stvaryŭšy cikavuju i zajmalnuju hulniu z nacyjanalnym kałarytam.
Siońnia my znajomim ź cikavymi faktami pra novuju nastołku.
«Bahač» — heta ekanamična-histaryčnaja hulnia pa-biełarusku i pra Biełaruś, zroblenaja ŭ supracy z historykami, dyzajnierami i mastakami pad kiraŭnictvam kamandy «Art Siadziby».
Ekanamičny składnik hulni navučyć vas finansavaj hramacie i pravilnamu raźmierkavańniu hrošaj na vydatki, a histaryčnaja častka pakaža, jakim byŭ Minsk u minułych stahodździach, jakija vulicy i šlachi davali šaniec tahačasnym žycharam nabivać svaje skarbonki i kišeni talerami.
Nastołka budzie składacca z hulniavoha pola z nazvami staradaŭnich vulic Miensku, histaryčnaj mapy horadu, kartak na majomaść i kamunalnyja pradpryjemstvy, admysłovych hrošaŭ «Taleraŭ», fišak i dźviuch hralnych kaściej.
5 cikavych faktaŭ pra nastolnuju hulniu «Bahač»:
1. Asoba «Bahača» — prezident Rady BNR
Na vokładcy hulni «Bahač» my namalavali nie prydumanaha hieroja, a realnuju asobu.
Pratatypam hetaha piersanaža staŭ biełarus Piotr Antonavič Kračeŭski — vybitny palityčny dziejač i historyk, delehat I Usiebiełaruskaha Kanhresu, siabra Rady BNR.
Z krasavika pa travień 1918 jon źjaŭlaŭsia ministaram finansaŭ BNR. U śniežni 1919 hoda byŭ abrany prezidentam Rady BNR.
Na fota Piotr Kračeŭski ŭ vierchnim šerahu, druhi źleva.
Piotr Kračeŭski kazaŭ: «Biaz movy niama nacyi, biez kultury — niama narodu i nia moža być Niezaležnaści, svajoj ułasnaj dziaržavy».
Jon vykonvaŭ abaviazki prezidentam Rady BNR da kanca žyćcia ŭ emihracyi, paśla prychodu balšavikoŭ na našyja ziemli.
2. Pravapis hulni — Taraškievica
Kab dasiahnuć bolšaj histaryčnaj realistyčnaści i adpaviednaści atmaśfiery XVIII stahodździa, u hulni «Bahač» vykarystoŭvajecca biełaruski kłasičny pravapis — Taraškievica. Hetaja moŭnaja sistema źjaŭlajecca pieršym unarmavanym pravapisam biełaruskaj movy.
Pieršaja narmalizacyja biełaruskaha pravapisu i hramatyki była zroblena Branisłavam Taraškievičam u 1918 hodzie. «Taraškievica» aficyjna ŭžyvałasia da reformy biełaruskaha pravapisu 1933 hoda.
3. Horad «Bahača» — Miensk
U hulni «Bahač» vulicy Miensku nosiać svaje spradviečnyja nazvy, isnuje konka, pracuje ramiznaje (pryvatnaje) voźnictva i dva čyhunačnyja vakzały. Turma znachodzicca ŭ Piščałaŭskim zamku, jaki zachavaŭsia i da našaha času. Horad abniesieny staradaŭnim ziemlanym vałam, a młyny na race Śvisłač mieluć ziernie.
4. Valuta hulni — Talery
U hulni «Bahač» vy płacicie i atrymlivajecie prybytak nie rublami, a talerami. Na Biełarusi talery ŭpieršyniu pačali adbivacca ŭ 1564 hodzie na Vilenskim manietnym dvary. U niezaležnaj Biełarusi sprabavali viarnuć talery da ŭžytku, ale hetaja zaduma nie ažyćciaviłasia. U hulni ŭviedzieny taler, jak nacyjanalnaja valuta, i prydumany dla jaje valutny simvał «Ŧ».
5. Simvały «Bahača» — Pahonia, Šaścikancovy kryž, Kalumny i Vaśmikancovaja zorka
Admysłova dla skrynki hulni byŭ raspracavany patern z asnoŭnymi nacyjanalnymi simvałami: Pahonia, Šaścikancovy kryž, Kalumny i Vaśmikancovaja zorka. Usie hetyja simvały kaliści byli vybranyja ludźmi ŭ narodnym hałasavańni na sajcie «Art Siadziby».
Spadarožnymi praduktami hulni stanuć cišotki, torby, nabory nalepak i paštoŭki.
Vydańnie nakłada hulni płanujecca na pačatku zimy da Kaladaŭ, jana stanie vydatnym śviatočnym padarunkam dla ŭsich biełarusaŭ.
Zimovym viečaram u kole siabroŭ, ci letam na pryrodzie z baćkami, nastolnaja hulnia «Bahač» dapamoža cikava i pryjemna pravieści volny čas, tamu varta paŭdzielničać u ažyćciaŭleńni prajekta!
U vas jość mahčymaść spryčynicca da stvareńnia i vydańnia pieršaj biełaruskaj ekanamičnaj nastolnaj hulni, a taksama stać fundataram, pieršym uładalnikam hulni, pa śpiecyjalnym košcie, atrymać dadatkovyja pradukty z malunkami «Bahača».
