Padpisanty zvarotu ličać, što ciapierašniaje kiraŭnictva Ministerstva ŭnutranych spraŭ nie ŭ stanie kantralavać svaich supracoŭnikaŭ, jakija faktyčna štotydzień stanoviacca fihurantami rezanansnych skandałaŭ.
U svaim zvarocie aŭtary pietycyi apisvajuć bolš za 10 historyj, jakija adbylisia ŭ 2016 hodzie i ŭ jakich milicyjanty datyčnyja da śmierci, kalectva abo abrazy hramadzian.
«My patrabujem:
- Zaraz ža navieści paradak u orhanach unutranych spraŭ, pravieści pravierku ŭsich supracoŭnikaŭ na adpaviednaść svaim pasadam, abaviazkova pravieryć psichičnaje zdaroŭje supracoŭnikaŭ MUS, pravieści pravierku na detektary chłuśni ŭsich biez vyklučeńnia supracoŭnikaŭ RAUS, AMAP, DVP na dačynieńnie da złačynstvaŭ suprać hramadzian Respubliki Biełaruś i pryciahnuć da adkaznaści tych, chto maje dačynieńnie da hibieli, źbićcia, źniavazie ludziej.
- Navieści paradak u turmach, spynić ździeki z aryštavanych i asudžanych.
- Zvolnić z pasady kiraŭnika milicyi hramadskaj biaśpieki, načalnika HUUS Minharvykankama, jaho namieśnika pa hramadskaj biaśpieki, načalnika minskaha AMAPa, načalnika DVP, jakija nie vykonvajuć svaje abaviazki.
- Vyklučyć z funkcyj tak zvanych «atradaŭ milicyi admysłovaha pryznačeńnia» (AMAP) funkcyi zabieśpiačeńnia pravaparadku, u tym liku na masavych akcyjach i mierapryjemstvach, prybrać AMAP z našych mirnych vulic, ci ŭvohule skasavać AMAP. U nas dastatkova supracoŭnikaŭ milicyi dla prafiesijnaha zabieśpiačeńnia pravaparadku
- Stvaryć pry MUS Hramadski Saviet (Kamitet), kudy b razam z pradstaŭnikami MUS ŭvajšli pradstaŭniki biełaruskaha hramadstva, pravaabaroncy, dla razhladu ŭsich kanfliktaŭ, fihurantami jakich źjaŭlajucca supracoŭniki MUS
- Jak maha chutčej pravieści reformu orhanaŭ unutranych spraŭ z šyrokim abmierkavańniem ŭ ŚMI», - havorycca ŭ pietycyi.
Akramia taho, aŭtary zvarotu prapanujuć ministru ŭnutranych spraŭ Iharu Šunieviču samomu padać u adstaŭku, kali jon nie moža arhanizavać dastojnuju rabotu svajho viedamstva.
Na dadzieny momant pad pietycyjaj padpisałasia 687 čałaviek.
