U Lipiecku nastajaciela chrama Illi praroka ŭ siale Jurskaje Vałoŭskaha rajona (RF) Viačasłava Kapycina prysudzili da troch hadoŭ źniavoleńnia za zhvałtavańnie. Akramia taho, jon pavinien vypłacić paciarpiełaj 300 tysiač rasijskich rubloŭ.
Achviaraj była jaho školnaja siabroŭka, ź jakoj jon padtrymlivaŭ blizkija adnosiny. Jana nie viedała, što ijerej žanaty, a kali joj stała pra heta viadoma, vyrašyła spynić stasunki.
Tym nie mienš, u mai 2015 hoda jon pryjšoŭ da jaje ŭ kvateru ŭ Lipiecku, pakłaŭ dziaciej spać, paśla čaho staŭ pahražać žančynie. «Jon vymotvaŭ mianie da troch hadzin nočy. Biŭ pa tvary, pa nyrkach. Prynižaŭ. Potym u mianie zdali niervy, i ja zasnuła. Jon loh pobač, skazaŭ, što ranicaj «praciahnie vychavaŭčyja pracedury». A siomaj ranicy jon skazaŭ, što choča tr*chacca i mianie zhvałciŭ. Potym syšoŭ, prystrašyŭšy raspravaj mnie i dzieciam, kali ja zajaŭlu ab tym, što zdaryłasia, u orhany», — pryvodzić pakazańni žančyny vydańnie Gorod48.
Paśla zhvałtavańnia Viačasłaŭ Kapycin praciahvaŭ pahražać svajoj siabroŭcy, abiacajučy prastrelić joj nohi z traŭmatyčnaha pistaleta «Asa» i zabić jaje dziaciej. «Jaki ja baciuška, sudzić nie tabie, a Bohu. Zrazumieła? Nie tabie słužu, a Bohu!» — kaža Kapycin na adnym z aŭdyjozapisaŭ, jakija pieradała ŭ redakcyju Gorod48 paciarpiełaja.
Pakul praciahvałasia rasśledavańnie spravy, vydańniu ŭdałosia znajści jašče adnu žančynu, jakaja naradziła dzicia ad ijereja. Pavodle jaje słoŭ, u Piermi, dzie jana žyła, Kapycin «haniaŭsia za joj z kipieniem» i pahražaŭ saskočyć ź dziciem z dachu doma. Jak raspaviała hetaja žančyna, Viačasłaŭ Kapycin pravodziŭ šmat času na sajtach znajomstvaŭ. «Jak jon mnie tłumačyŭ, u Lipiecku ŭ jaho było ŭsio naładžana: siońnia — adna, zaŭtra — inšaja», — paviedamiła jana vydańniu. U sacyjalnych sietkach jon padpisvaŭsia jak Słava KVN.
Viačasłaŭ Kapycin admoviŭsia abskardzić prysud. «Ja vinavaty pierad Boham, ale nie pierad zakonam», — zajaviŭ jon paśla pasiadžeńnia.
Pieršapačatkova śviatar abvinavačvaŭsia jašče ŭ pahrozach inšaj paluboŭnicy, adznačaje miascovaje vydańnie «Mojo». U studzieni 2014 hoda na mohiłkach jon pahražaŭ joj nažom za toje, što taja admoviłasia zajmacca ź im seksam, a praź niekalki miesiacaŭ pahražaŭ arbaletam. Ad hetych abvinavačvańniaŭ prakuratura admoviłasia.
Paśla pačatku śledstva Viačasłaŭ Kapycin znachodziŭsia ŭ SIZA. Ź listapada 2015 hoda jaho pieraviali pad chatni aryšt. Utrymańnie pad vartaj uličać pry raźliku terminu, jaki jon praviadzie ŭ kałonii.
U Lipieckaj mitrapolii admovilisia kamientavać prysud Kastryčnickaha rajonnaha suda ŭ dačynieńni da taho, ci zastaniecca ŭ sanie Viačasłaŭ Kapycin. GOROD48 paraili źviartacca z hetym pytańniem u Sinod u Maskvu.
