20 hadoŭ tamu, 27 listapada 1996 hoda, z padjaznych šlachoŭ čyhunačnaj stancyi Jacuki ŭ Dziatłaŭskim rajonie Hrodzienskaj vobłaści byŭ adpraŭleny ŭ Rasiju apošni ešałon ź mižkantynientalnymi balistyčnymi rakietami RS-12M «Tapola». Paśla hetaha Biełaruś stała biaźjadziernaj dziaržavaj.
Va ŭračystaj cyrymonii ŭ Jacukach udzielničali pradstaŭniki ŭładnych struktur Biełarusi i Rasii, vysokapastaŭlenyja vajskoŭcy dźviuch krain. Prezident Biełarusi Alaksandr Łukašenka nie pryjechaŭ. Paźniej jon nieadnarazova zajaŭlaŭ pra toje, što škaduje ab vyvadzie mižkantynientalnych balistyčnych rakiet.
U pryvatnaści, na pres-kanfierencyi rasijskim rehijanalnym ŚMI ŭ Minsku 17 kastryčnika 2014 hoda vyvad z terytoryi Biełarusi jadziernaj zbroi Łukašenka nazvaŭ samaj surjoznaj pamyłkaj svajho prezidenctva.
«Ja škaduju pra heta, — kali my vyvieli jadziernuju zbroju ź Biełarusi», — zajaviŭ tady kiraŭnik dziaržavy. «I my heta zrabili absalutna biaspłatna, — padkreśliŭ Łukašenka. — Ja pavinien byŭ vykonvać damoŭlenaści, pryniatyja da mianie. Heta abaviazkova».
Pry hetym jon ličyć, što moh by ich i nie prytrymlivacca: «U toj błytaninie, u tym, što tady było, nichto b na mianie praźmierna nie nacisnuŭ. Kali b nie Jelcyn (prezident Rasii), moža być, ja b tak i pastupiŭ. Ale jaho kamarylla, jana jaho pastajanna padšturchoŭvała».
Łukašenka nahadaŭ, što dla krainy tady byli ciažkija časy: «Niama ni hazu, ni nafty, hołaja kraina. Ničoha niama». Jon raspavioŭ, što jaho pierakonvaŭ vyvieści zbroju i prezident Ukrainy Leanid Kučma: «Kučma skazaŭ, nu što ty, Saša, čaplaješsia za hetuju zbroju. My jaje absłužyć nie zmožam».
«Ciapier z vyšyni pražytaha ja baču: usio b my absłužyli, usio b było narmalna, — zajaviŭ Łukašenka. — I nami b nichto nie kamandavaŭ i nie paturaŭ, jak ciapier».
Pavodle infarmacyi MZS Biełarusi, kraina ŭpieršyniu zajaviła pra svoj namier zrabić svaju terytoryju biaźjadziernaj zonaj ŭ 1990 hodzie ŭ dekłaracyi «Ab dziaržaŭnym suvierenitecie Respubliki Biełaruś». Padpisaŭšy ŭ 1992 hodzie Lisabonski pratakoł, jana aformiła členstva ŭ Dahavory ab skaračeńni stratehičnych nastupalnych uzbrajeńniaŭ (DSNU). Hety krok byŭ nieparyŭna źviazany z pryniaćciem najvažniejšaha palityčnaha rašeńnia ab dałučeńni Biełarusi da Damovy ab nieraspaŭsiudžańni jadziernaj zbroi ŭ jakaści dziaržavy, jakaja nie vałodaje jadziernaj zbrojaj.
U lipieni 1993 hoda Biełaruś aficyjna dałučyłasia da DNIAZ, staŭšy pieršaj dziaržavaj, jakaja dobraachvotna admoviłasia ad mahčymaści vałodańnia jadziernaj zbrojaj, jakaja zastałasia paśla raspadu SSSR.
U MZS padkreślivajuć, što Biełaruś admoviłasia ad vałodańnia samym sučasnym vajennym jadziernym patencyjałam biez usialakich papiarednich umoŭ i ahavorak. Tym samym kraina faktyčna pakłała pačatak pracesu ŭrehulavańnia pytańniaŭ jadziernaha razzbrajeńnia na postsavieckaj prastory ŭ intaresach mižnarodnaha miru i biaśpieki.
Vitajučy fakt dałučeńnia Biełarusi da DNIAZ u jakaści niajadziernaj dziaržavy, Vialikabrytanija, Rasija i ZŠA vydali Biełarusi harantyi biaśpieki, zafiksavaŭšy svaje abaviazacielstvy ŭ Budapiešckim miemarandumie 5 śniežnia 1994 hoda.
