«My vypisvajem toje, što vydaje dziaržava» — navošta minskija škoły vypisvajuć partyjnuju hazietu «Kamunist Biełarusi»?
Jak vyśvietliłasia, minskija ŭstanovy adukacyi masava padpisvajucca na partyjnaje vydańnie kamunistaŭ, kab «usiebakova vałodać infarmacyjaj».
Za śpis «rekamiendavanaj» presy adkazvajuć u hałoŭnym upraŭleńni ideałahičnaj i vychavaŭčaj raboty Minharvykankama. Praŭda, tam paviedamili, što «Kamunist Biełarusi» siarod rekamiendavanych vydańniaŭ adsutničaje.
Ale ž hazietu minskija škoły sapraŭdy vypisvajuć.
«Heta my vypisvajem za školnyja hrošy, tam šerah vydańniaŭ. Jany patrebnyja nam dla ahulnaha raźvićcia. My vypisvajem vydańni, kab vałodać infarmacyjaj z roznych bakoŭ. I hetyja vydańni ni kłasnych, ni dziaciej nie datyčnyja. Heta mietadyčnaja padborka, ale ni jakim čynam nie prapahanda», — raspaviała Anžalika Kazłoŭskaja, zavuč pa vychavaŭčaj pracy minskaj škoły №162.
Prykładna toje ž samaje adkazali i ŭ adnoj sa staličnych himnazij.
«Hetyja vydańni naš asabisty vybar. My — himnazija, u nas finansavaja niezaležnaść ad upraŭleńnia adukacyi. I vydańni, u tym liku i «Kamunist Biełarusi», my vypisvajem za hrošy škoły, jakija zarabili płatnymi pasłuhami, — paviedamiła «Našaj Nivie» Natalla Šurdziakova, zavuč pa vychavaŭčaj pracy.
Ale ž navošta ŭ škole vydańnie biełaruskich kamunistaŭ?
«A jak vy dumajecie? Dzieci jakija rychtujucca stać u budučym vysokaadukavanymi ludźmi i vielmi dobra aryjentavacca ŭ palitycy — jany mohuć viedać, chto taki kamunist u Biełarusi? Adkul im heta viedać? — zadałasia pytańniem Šurdziakova. — Kali ŭ nas apazicyjnyja struktury pravodziać svaje hetyja schodki, hulajuć pa ŭsim Minsku, to im možna, a vypisać dziaržaŭny srodak masavaj infarmacyi, to ŭ niekaha treba spytać dazvołu?».
Praŭda, na pytańnie, ci vypisvaje himnazija inšyja partyjnyja vydańni, zavuč nie adkazała.
«My vypisvajem toje, što vydaje dziaržava, razumiejecie? My dziaržaŭnaja ŭstanova adukacyi i vypisvajem dziaržaŭnyja sroki masavaj infarmacyi!», — paviedamiła jana.
Nahadajem, zasnavalnik haziety — Kamunistyčnaja partyja Biełarusi, a nijak nie dziaržava.
Kamientary