Vypusknikam, jakija admovilisia ad raźmierkavańnia, ciapier nie treba budzie viartać stypiendyi za hady navučańnia
U Biełarusi maładym śpiecyjalistam, jakija admovilisia ad raźmierkavańnia, ciapier nie pryjdziecca viartać stypiendyi za hady navučańnia, vynikaje z pastanovy ŭrada ad 7 śniežnia № 998, tekst jakoha raźmieščany na sajcie Saŭmina.
Hetym dakumientam, jaki nabyŭ moc paśla aficyjnaha apublikavańnia, uniesienyja źmieny ŭ pastanovu «Ab niekatorych pytańniach raźmierkavańnia, pieraraźmierkavańnia, nakiravańnia na pracu, nastupnaha nakiravańnia na pracu vypusknikoŭ, kampiensavańnia zatračanych dziaržavaj srodkaŭ na ich padrychtoŭku i metavaj padrychtoŭki śpiecyjalistaŭ, rabočych, słužačych», što dziejničaje z 2011 hoda.
Źmieny datyčacca paradku kampiensacyi srodkaŭ, jakija dziaržava vydatkavała na padrychtoŭku navukovaha rabotnika vyšejšaj kvalifikacyi, śpiecyjalista, rabočaha, słužačaha. Vydatki na sacyjalnuju padtrymku, u pryvatnaści stypiendyi, biaspłatnaje charčavańnie, traty na ŭtrymańnie internataŭ zaraz nie treba budzie kampiensavać pry admovie studenta ad raźmierkavańnia.
U sumu zatračanych dziaržavaj srodkaŭ, jakija ŭ takim vypadku nieabchodna viarnuć, u novaj redakcyi dakumienta ŭvachodziać zarpłata rabočych i słužačych, uznosy na sacyjalnaje strachavańnie, miakki invientar i abmundziravańnie, inšyja raschodnyja materyjały i pradmiety zabieśpiačeńnia, kamandziroŭki i słužbovyja raźjezdy, apłata transpartnych pasłuh, apłata pasłuh suviazi, apłata kamunalnych pasłuh, apłata biahučaha ramontu abstalavańnia i invientaru, a taksama inšyja biahučyja vydatki.
Suma srodkaŭ, vydatkavanych na padrychtoŭku adnaho navučenca za poŭny kalandarny hod padrychtoŭki, raźličvajecca šlacham dzialeńnia biahučych faktyčnych vydatkaŭ na padstavie hadavoj buchhałtarskaj spravazdačnaści na pryviedzienuju siaredniuju kolkaść navučencaŭ. Taksama pastanova vyznačaje, jak raźličvajucca sumy ŭ vypadku niapoŭnaha hoda navučańnia, a taksama ŭstanaŭlivaje mietodyku raźliku siaredniaj kolkaści navučencaŭ ustanoŭ adukacyi.
Sistema abaviazkovaha raźmierkavańnia vypusknikoŭ VNU i SSNU, jakija navučajucca za košt biudžetnych srodkaŭ, zastajecca siarod tych składnikaŭ sistemy adukacyi, što najbolš krytykujucca. Jak paviedamlałasia, biełaruskija studenckija arhanizacyi i inicyjatyvy ŭ listapadzie zapuścili kampaniju pa refarmavańni sistemy raźmierkavańnia ŭ Biełarusi. Na elektronnaj placoŭcy zvarot.by źjaviłasia mahčymaść padpisać kalektyŭny zvarot u Ministerstva adukacyi i Pałatu pradstaŭnikoŭ z prapanovaj refarmavać sistemu raźmierkavańnia vypusknikoŭ VNU i SSNU.
Asnoŭnym inicyjataram zvarotu vystupiła moładzievaja niaŭradavaja arhanizacyja «Studenckaja rada». U svaim zvarocie jaje členy zajaŭlajuć, što «prymusovaje raźmierkavańnie supiarečyć ratyfikavanym Biełaruśsiu kanviencyjam MAP «Ab prymusovaj pracy» i «Ab skasavańni prymusovaj pracy». Źviartajecca ŭvaha na toje, što student, jaki navučajecca za košt biudžetu, nie maje prava vybaru pracoŭnaha miesca i nie moža admovicca ad prapanavanaha varyjantu bieź niehatyŭnych nastupstvaŭ dla siabie. Taksama adznačajecca, što status maładoha śpiecyjalista i adpaviednyja lhoty atrymlivajuć tolki vypuskniki biudžetnych adździaleńniaŭ.
Ciapier čytajuć
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier

Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier
«Kali ciapier chierova, značyć, heta jašče nie kaniec». Pahutaryli z epatažnym «śviatarom XXI stahodździa», pra jakoha nie było čuvać piać hadoŭ paśla aryštu

Kamientary