Śledčy kamitet vystaviŭ abvinavačvańnie 22-hadovamu kiroŭcu ź Pinska, jaki pad uździejańniem narkotykaŭ źbiŭ na piešachodnym pierachodzie žančynu, paviedamiła BiełTA aficyjny pradstaŭnik USK pa Bresckaj vobłaści Maryna Drańkova.
Darožna-transpartnaje zdareńnie adbyłosia ŭ centry horada ŭ kancy vosieni. Kiroŭca aŭtamabila «Opiel Viektra» ŭčyniŭ najezd na 42-hadovuju miascovuju žycharku, jakaja išła pa nierehulavanym piešachodnym pierachodzie. U vyniku avaryi pinčanka atrymała traŭmy hałavy i była špitalizavanaja. Ciapier jana ŭžo vypisanaja z balnicy dadomu. Sudova-chimičnyja daśledavańni pakazali, što kiroŭca ŭ momant ździajśnieńnia DTZ znachodziŭsia pad uździejańniem marychuany. Na padstavie hetaha Pinski mižrajonny adździeł Śledčaha kamiteta raspačaŭ kryminalnuju spravu pa č. 4 art. 317 KK (parušeńnie PDR asobaj, jakaja kiravała aŭtamabilem u stanie narkatyčnaha apjanieńnia, što paciahnuła pa nieaściarožnaści pryčynieńnie ciažkaha cialesnaha paškodžańnia).
Padazravany byŭ zatrymany i zaklučany pad vartu. Jamu vystaŭlenaje abvinavačvańnie. Dapytanyja ŭdzielniki DTZ i śviedki, praviedzieny śledčy ekśpierymient. Dla vyśviatleńnia ŭsich abstavinaŭ taho, što adbyłosia, pryznačana aŭtatechničnaja i sudova-psichijatryčnaja ekśpiertyzy. Abvinavačany nidzie nie pracuje, raniej jon pryciahvaŭsia da kryminalnaj adkaznaści za niezakonny abarot narkotykaŭ.
Kamientary