Supracoŭniki kryminalnaha vyšuku Frunzienskaha RUUS Minska raskryli dva rabavańnia, učynienych napiaredadni navahodnich śviataŭ. Takaja infarmacyja ŭtrymlivajecca ŭ paviedamleńni aficyjnaha pradstaŭnika Frunzienskaha RUUS Natalli Askirka, raźmieščanym na sajcie HUUS Minharvykankama.
Mužčyny paznajomilisia ŭ hulniavym kłubie pa vulicy Piatra Hlebki. Paśla taho, jak adzin ź ich vyjhraŭ kala 400 rubloŭ, jany vyjšli na vulicu. Tam złamyśnik źbiŭ mužčynu, zabraŭ hrošy, pašpart, bankaŭskuju kartku i viarnuŭsia ŭ hulniavy kłub. Paciarpieły nieŭzabavie pryjšoŭ u prytomnaść i, vyklikaŭšy taksi, pajechaŭ u milicyju.
Praź niekatory čas złamyśnik patelefanavaŭ svajmu pryjacielu i prapanavaŭ ździejśnić rabavańnie. Jany sustrelisia kala kłuba i adpravilisia pieššu dadomu da inicyjatara za bałakłavami. Adtul vyklikali taksi. Kali padjechała mašyna, adzin z mužčyn adkryŭ piarednija dźviery mašyny z boku kiroŭcy i staŭ źbivać taksista, a druhi sieŭ na zadniaje siadzieńnie i pačaŭ dušyć, patrabujučy hrošaj. Tak mužčynam udałosia atrymać jašče kala 400 rubloŭ. Paśla napadu taksist vyklikaŭ milicyju.
Złamyśniki zatrymanyja. Imi akazalisia niepracujučyja minčuki: navučeniec adnaho sa staličnych kaledžaŭ, jaki niadaŭna adśviatkavaŭ paŭnalećcie, i 19-hadovy chłopiec, jaki ŭ listapadzie 2016 hoda viarnuŭsia z armii. Abodva raniej da kryminalnaj adkaznaści nie pryciahvalisia.
Raspačataja kryminalnaja sprava pa č. 2 art. 206 (rabavańnie), sankcyi jakoj praduhledžvajuć pazbaŭleńnie voli na termin da 6 hadoŭ.
