U sieradu ranicaj u italjanskich abłaściach Łacyjo, Abruca i Marka na praciahu hadziny adbylisia try mocnyja ziemlatrusy mahnitudaj ad 5,3 da 5,7, paviedamlaje VVS.
Paviedamlajecca, što žychary horada Akviła, jaki ŭ 2009 hodzie byŭ amal całkam razburany ŭ vyniku ziemlatrusu, u panicy vybiahali na vulicy. Miascovyja ŚMI paviedamlajuć, što ŭ horadzie Amatryče razburyłasia zvanica, paškodžanaja ŭ vyniku letašnich padziemnych šturškoŭ.
Padziemnyja šturški adčuvalisia ŭ tym liku ŭ Rymie, raźmieščanym prykładna ŭ 100 km ad epicentra. Pasažyry rymskaha mietro i vučni niekatorych škoł italjanskaj stalicy byli evakujavanyja.
Paviedamleńni ab achviarach i paciarpiełych nie pastupali.
Miascovyja ŭłady paviedamlajuć, što acanić škodu ad ziemlatrusu budzie niaprosta z-za mocnych śniehapadaŭ, jakija abciažarvajuć ruch transpartu ŭ centralnaj Italii.