Ekśpierty słužby MAHATE pa ahladzie placoŭki i kanstrukcyj atamnych abjektaŭ z ulikam źniešnich pahroz (SEED-misija) pravodziać acenku Biełaruskaj AES nie ŭ poŭnym abjomie, ličyć Ministerstva zamiežnych spraŭ Litvy.
Takaja vysnova zroblenaja na padstavie lista ad hienieralnaha dyrektara MAHATE Jukii Amana, u jakim raskazana pra detali praviadzieńnia SEED-misii 16—20 studzienia na Biełaruskaj AES. List staŭ adkazam na zapyt litoŭskaha źniešniepalityčnaha viedamstva.
Pavodle źviestak pres-słužby MZS Litvy, u liście hiendyrektar MAHATE paćvierdziŭ, što ŭ Biełarusi pravodzicca niapoŭnaja SEED-misija. Rašeńnie ab tym, što kankretna buduć aceńvać ekśpierty mižnarodnaj arhanizacyi, vyznačaŭ bok, jaki prymaje, a nie MAHATE.
Litoŭski bok źviartaje ŭvahu na toj fakt, što ekśpierty misii nie buduć analizavać takija klučavyja pytańni, jak krytery vybaru budplacoŭki, uździejańnie na navakolnaje asiarodździe i toje, jakim čynam pravodzilisia daśledavańni siejśmičnaj aktyŭnaści rajona, kali takaja praca mieła miesca ŭ pryncypie. MZS Litvy miarkuje, što maštab raboty SEED-misii na BiełAES, vierahodna, budzie abmiežavany tolki acenkaj biaśpieki kanstrukcyj.
«My vielmi zaniepakojenyja tym, što Biełaruś prymianiaje standarty jadziernaj biaśpieki vybaračna, heta nieprymalna, — cytuje pres-słužba MZS ministra zamiežnych spraŭ Litvy Linasa Linkiavičusa. — Biełaruś prapuściła pytańnie acenki budaŭničaj placoŭki i zaprasiła SEED-misiju, jakaja, chutčej za ŭsio, abmiažujecca acenkaj biaśpieki kanstrukcyj. Praca misii MAHATE zaklučajecca ŭ acency tolki tych modulaŭ, jakija vyznačanyja Biełaruśsiu. A zatym kraina publična zajavić pra niekatoryja stanoŭčyja vyniki, čym uviadzie ŭ zman svajo hramadstva i zamiežnyja krainy».
Pavodle słoŭ Linkiavičusa, taki vybiralny padychod da prymianieńnia norm jadziernaj biaśpieki navodzić na dumku ab tym, što raspracoŭnikam BiełAES jość što chavać.
SEED-misija na Biełaruskaj AES pracuje z 16 pa 20 studzienia. Praces padrychtoŭki spravazdačy misii ŭ siarednim zajmaje try-šeść miesiacaŭ, adnak biełaruski bok i MAHATE damovilisia prykłaści maksimum namahańniaŭ, kab paskoryć hety praces. Biełaruskaje MZS miarkuje, što dakumient vyjdzie nie raniej za sakavik.
Litva nieadnarazova patrabavała ad Biełarusi pravieści SEED-misiju i inšyja acenačnyja misii MAHATE. Apošnim časam litoŭski bok usio čaściej staŭ zajaŭlać pra nieabchodnaść niezaležnaj acenki taho, što adbyvajecca na budaŭničaj placoŭcy BiełAES, asabliva paśla sieryi incydentaŭ, u tym liku z karpusami reaktaraŭ dla stancyi.
