Jeŭrapiejskaja kamisija dazvoliła jašče na try miesiacy padoŭžyć dziejańnie pamiežnaha kantrolu dla niekatorych krain, jakija ŭvachodziać u Šenhienskuju zonu, paviedamlaje VVS.
Heta tyčycca Aŭstryi, Hiermanii, Šviecyi, Danii i nie ŭvachodziačaj u ES Narviehii, jakija ŭ 2015 hodzie ŭviali pravierki na miežach na fonie rekordnaha prytoku ŭ hetyja krainy biežancaŭ ź Siryi i mihrantaŭ z krain Afryki i Blizkaha Uschodu.
Jeŭrakamisija raniej dała dazvoł hetym krainam na ŭviadzieńnie pamiežnaha kantrolu, ale dziejańnie hetaha dazvołu zakančvajecca ŭ siaredzinie lutaha.
U Jeŭrakamisii rastłumačyli padaŭžeńnie režymu pamiežnaha kantrolu nieabchodnaściu pieraadoleć mihracyjny kryzis u Jeŭropie. U viedamstvie nahadali, što ŭ Hrecyi da hetaha času znachodzicca vialikaja kolkaść biežancaŭ i mihrantaŭ.
U paviedamleńni viedamstva havorycca, što ŭmovy dla viartańnia da narmalnaha funkcyjanavańnia Šenhienskaj zony pakul nie stvoranyja.
Raniej u Brusieli zajaŭlali, što chacieli b adnavić Šenhienskuju zonu biez pamiežnaha kantrolu. Ciapier u jaje ŭvachodziać 22 krainy ES, a taksama Narviehija, Šviejcaryja, Isłandyja i Lichtenštejn. De-fakta režym adkrytych miežaŭ dziejničaje i ŭ dačynieńni da troch mikradziaržaŭ — Vatykana, San-Maryna i Manaka.
