Aficyjny pradstaŭnik Biełarusi na mižnarodnym konkursie pieśni «Jeŭrabačańnie-2017» u Kijevie hurt Naviband vystupić 11 maja ŭ druhoj častcy druhoha paŭfinału.
fota Mikity Niedavierkava
Jak paviedamlaje pres-słužba Biełteleradyjokampanii, losavańnie raźmierkavańnia krain-udzielnic pa dvuch paŭfinałach konkursu prajšło 31 studzienia.
Usiaho ŭ hetym hodzie ŭ konkursie voźmie ŭdzieł 43 krainy. Vyznačana, što ŭ pieršym paŭfinale 9 maja vystupiać 18 krain, u druhim 11 maja — 19.
U druhim paŭfinale razam ź Biełaruśsiu vystupiać i prahałasujuć: Aŭstryja, Bałharyja, Vienhryja, Danija, Izrail, Irłandyja, Litva, Makiedonija, Malta, Niderłandy, Narviehija, Rasija, Rumynija, San-Maryna, Sierbija, Charvatyja, Šviejcaryja i Estonija.
Italija, Ispanija, Hiermanija, Francyja, Vialikabrytanija i arhanizatar konkursu hetaha hoda Ukraina aŭtamatyčna traplajuć u finał 13 maja, adnak jany taksama tranślujuć paŭfinały i hałasujuć za ich udzielnikaŭ. Italija, Ispanija i Vialikabrytanija buduć aceńvać kankursantaŭ pieršaha paŭfinału, a Hiermanija, Francyja i Ukraina — druhoha.
Paradkavyja numary ŭdzielnikaŭ abodvuch paŭfinałaŭ buduć vyznačany paźniej rašeńniem pradziusaraŭ šou. Takaja sistema raźmierkavańnia kankursantaŭ u paŭfinałach dziejničaje ŭžo niekalki hadoŭ i dazvalaje arhanizataram rabić šou efiektnym i ŭnikalnym.
Hurt Naviband u składzie Arcioma Łukjanienki i Ksienii Žuk źjaviŭsia ŭ 2014 hodzie i vykonvaje ŭ asnoŭnym biełaruskamoŭnyja pieśni. U adboračnym tury na «Jeŭrabačańnie» jany ŭdzielničajuć druhi raz. U dzień finału nacyjanalnaha adboračnaha tura konkursu, 20 studzienia, hurt vypuściŭ treci albom pad nazvaj «Iluminacyja», jaki pradstavić na kancercie 14 lutaha ŭ Minsku.
Mižnarodny konkurs pieśni «Jeŭrabačańnie-2017» projdzie ŭ Kijevie z 9 pa 13 maja.
