«My zaŭsiody hatovyja abmiarkoŭvać lubyja pytańni, u tym liku niaprostyja, z tym, kab znachodzić ich rašeńni», — zajaviŭ kiraŭnik MZS Rasii Siarhiej Łaŭroŭ 21 lutaha na sustrečy ź biełaruskim kaleham Uładzimiram Makiejem u Maskvie, pieradaje pres-słužba rasijskaha viedamstva.
«Čym bolš u nas raźvivajecca supracoŭnictva i partniorstva, čym hłybiej my pieraplatajemsia ŭ ekanamičnym, humanitarnym i čysta čałaviečym płanie, tym bolš uźnikaje zadač, jakija treba budzie vyrašać», — źviarnuŭsia da kalehi Łaŭroŭ.
Łaŭroŭ adznačyŭ, što ŭzajemadziejańnie pamiž ministerstvami zamiežnych spraŭ i inšymi viedamstvami Rasii i Biełarusi raźvivajecca pa-dziełavomu i ŭ pracoŭnym režymie.
Na siońniašniaj sustrečy ministry płanujuć abmierkavać pytańni supracoŭnictva ŭ AAN, ABSIE, pa jeŭrapiejskich spravach z ulikam adnosin ź ES, NATA, a taksama vykanańnie prahramy ŭzhodnienych dziejańniaŭ u halinie źniešniaj palityki Sajuznaj dziaržavy Rasii i Biełarusi na bližejšy hod i sfarmavać płan padrychtoŭki da 25-hodździa ŭstanaŭleńnia dypłamatyčnych adnosin pamiž krainami.
«Biezumoŭna, my razhledzim dvuchbakovyja pytańni, jakija ŭ nas tradycyjna stajać na paradku dnia», — adznačyŭ Łaŭroŭ.
U svaju čarhu Uładzimir Makiej zajaviŭ, što prablemy ŭ adnosinach Maskvy i Minska padlahajuć vyrašeńniu, pieradaje «RIAN».
— Heta dobraja mahčymaść abmierkavać šerah aktualnych pytańniaŭ našaha dvuchbakovaha i šmatbakovaha supracoŭnictva, z tym kab my da 25-hodździa ŭstanaŭleńnia dvuchbakovych adnosin padyšli ź niejkmi zavajovami, a nie prosta kab havaryli ab tym, što ŭ nas uźnikli niejkija prablemy, — skazaŭ jon, padkreśliŭšy, što «heta takija prablemy, jakija padlahajuć vyrašeńniu».
Kamientary