U svaim novym prajekcie Maksim Saryčaŭ daśleduje hvałt jak instrumient ułady dziela kantralavańnia sacyjalnaha asiarodku. Heta tema zaŭždy prysutničała ŭ tvorčaści aŭtara, ale tut havorka idzie nie stolki pra kankretnyja padziei ci źjavy biełaruskaj štodzionnaści, jak pra adčuvańnie niebiaśpieki ŭ aŭtarytarnym hramadstvie i miechanizmy siłavoj rehulacyi.
Palityčny čyńnik hraje davoli značnuju rolu ŭ sučasnym mastactvie Biełarusi. Pravy čałavieka, zakonnaść i demakratyja — hetyja kaštoŭnaści zastajucca prablemnymi, majuć nieadnaznačny status. Prafiesijnaja pazicyja, jakuju zajmaje Saryčaŭ, lažyć na miažy krytyčnaha mastactva i žurnalistyki, što tłumačyć zasiarodžanaść aŭtara na hramadska-palityčnaj tematycy. Padavałasia b, pratestavy dyskurs nakładaje peŭnyja abmiežavańni, adnak u svaim daśledavańni temy Saryčaŭ vychodzić za miežy vyklučna biełaruskaj situacyi, achoplivaje šyrejšaje pole, zakranaje ŭzrovień pobytavaj psichałohii.
«Ślapaja zona» jadnaje fatahrafiju, hrafiku, znojdzienyja abjekty, histaryčny materyjał. Vykarystańnie ŭ prajekcie dakumientalnaj fatahrafii i archivu razam z pastanovačnymi zdymkami dazvalaje ŭdaskanalić naratyŭ, u jakim spałučajucca pryvatnyja historyi i jaskravyja spasyłki na miascovy palityčny kantekst. Razam z tym vykazvańnie nie zvodzicca da vyklučnaj radykalnaj pazicyi, aŭtar chutčej imkniecca abjadnać dobra znajomyja vobrazy i padać ahulnuju karcinu, paralelna refleksujučy nad svaim staŭleńniem da jaje.
Na siońniašni dzień Maksim Saryčaŭ — napeŭna, adzin z najbolš viadomych vizualnych mastakoŭ Biełarusi, jaki pracuje z temaj ułady i hramadstva. Siarod jahonych prafiesijnych dasiahnieńniaŭ — šmatlikija ŭznaharody ŭ nacyjanalnych konkursach i ŭdzieł u mižnarodnych fiestyvalach, takich jak Warsaw Photo Days 2013 (Polšča), Vilnius Photo Circle 2013, 2014, 2016 (Litva), Tbilisi Photo Festival 2016 (Hruzija). Saryčaŭ — pieramožca važnych fotapadziejaŭ Biełarusi: konkursaŭ PRAFOTA 2015 i Belarus Press Photo 2015. Udzielnik kalektyvu mastakoŭ LĒD.
Vystava prachodzić u prastory «CECH» pa adrasie vuł.Kastryčnickaja, 16, druhi pavierch (nad «Chulihanam»).
Vystava praciahniecca da 6 sakavika.
Košt uvachodu — 4 rub. Školnikam, studentam i piensijanieram — 2 rub. (pa pradjaŭleńni paśviedčańnia).
