2 sakavika 2017 h. spaŭniajecca 25 hadoŭ z dnia ŭstalavańnia dypłamatyčnych adnosin pamiž Polščaj i Biełaruśsiu. U suviazi z hetym archiŭ polskaha MZS prezientavaŭ histaryčnyja dakumienty i fotazdymki, pryśviečanyja hetaj padziei.
Najbolš važnym dakumientam, jaki ŭvachodzić u pradstaŭlenyja materyjały, źjaŭlajecca pahadnieńnie ab ustalavańni dypłamatyčnych adnosin ad 2 sakavika 1992 h. Jaho padpisali ministry zamiežnych spraŭ Polščy i Biełarusi — Kšyštaf Skubišeŭski i Piatro Kraŭčanka, jaki znachodziŭsia ź vizitam u Varšavie. Źmieščany dźvie moŭnyja viersii (polskaja i biełaruskaja) padpisanaha pahadnieńnia.
Siarod prezientavanych materyjałaŭ jość davierčyja hramaty pieršych dypłamatyčnych pradstaŭnikoŭ Polščy i Biełarusi — Janiny Elžbiety Smułek (Elžbiety Smułkovaj) i Uładzimira Sańko, a taksama kopija dypłamatyčnaha pašparta polskaha pasła.
Źmieščany taksama fotazdymki davajennaha pieryjadu, źviazanyja ź dziejnaściu Hienieralnaha konsulstva Polščy ŭ Minsku, na ich pradstaŭleny budynak dypmisii i jaje piersanał.
U davajenny pieryjad u Minsku dziejničała Hienieralnaje konsulstva RP, padnačalenaje Pasolstvu ŭ Maskvie. Ustanova pracavała da 1939 h., jaje apošnim kiraŭnikom byŭ Kazimiež Rudski. U paślavajenny čas (z 1972 h.) u Minsku dziejničała taksama Hienieralnaje konsulstva PNR.
U vyniku palityčnych źmien 1989 i nastupnych hadoŭ, pastupovaha raspadu Savieckaha Sajuza Polšča nabyła niezaležnaść, pačała budavacca biełaruskaja dziaržaŭnaść. 25 žniŭnia 1991 h. Viarchoŭny Saviet tahačasnaj Biełaruskaj Savieckaj Sacyjalistyčnaj Respubliki abviaściŭ ab niezaležnaści. Praź niekalki dzion — 31 žniŭnia — Parłamient Polščy pryniaŭ pastanovu, u jakoj adznačałasia, što «Siejm Respubliki Polšča z radaściu vitaje abviaščeńnie niezaležnaści Biełarusi 25 žniŭnia 1991 h.», jakoje stała «realizacyjaj pamknieńniaŭ biełaruskaha naroda». 10 kastryčnika 1991 h. była padpisana Dekłaracyja ab dobrasusiedstvie, uzajemarazumieńni i supracoŭnictvie, a šlach da ŭstalavańnia dypłamatyčnych adnosin adkryŭ aficyjny raspad SSSR u śniežni 1991 h. Uzajemaadnosiny byli ŭstalavany ŭ ramkach pahadnieńnia, padpisanaha ministrami zamiežnych spraŭ 2 sakavika 1992 h., što dazvoliła abmianiacca dypłamatyčnymi pradstaŭnikami (spačatku ŭ ranzie časovych pavieranych) i stvaryć dypmisii ŭ Varšavie i Minsku. U hetym ža hodzie — 23 červienia 1992 h. — Prezident Polščy Lech Vałensa i Staršynia Viarchoŭnaha Savieta Respubliki Biełaruś Stanisłaŭ Šuškievič padpisali ŭ Varšavie Dahavor ab dobrasusiedstvie i pryjaznym supracoŭnictvie.
