Rada nacyjanalnaj biaśpieki i abarony (RNBA) Ukrainy pryniała rašeńnie časova spynić hruzavyja pieravozki praź liniju raźmiežavańnia ŭ zonie ŭzbrojenaha kanfliktu na Danbasie, pieradaje Ukrinfarm.
Fota: dpsu.gov.ua
Jak paviedamiŭ sakratar RNBA Alaksandr Turčynaŭ pa vynikach pasiadžeńnia, da 13.00 sierady pavinny być pierakrytyja usie aŭtamabilnyja i čyhunačnyja šlachi, jakija viaduć da linii raźmiežavańnia ŭ zonie ŭzbrojenaha kanfliktu.
Jak paviedamlaŭ UNIAN, uličvajučy zachop ukrainskich pradpryjemstvaŭ i abvastreńnie situacyi ŭ zonie ATA, RNBA pryniaŭ rašeńnie spynić pieravozki hruzaŭ praź liniju sutyknieńnia, faktyčna padtrymaŭšy błakadu čyhunki z akupavanych rajonaŭ na Danbasie, jakuju ažyćciaŭlajuć vieterany ATA.
Rašeńnie budzie dziejničać da realizacyi pieršych dvuch punktaŭ Minskich damoŭlenascjaŭ, jakija praduhledžvajuć spynieńnie ahniu, a taksama da viartańnia pad ŭkrainskuju jurysdykcyju zachoplenych na Danbasie pradpryjemstvaŭ, paviedamiŭ sakratar RNBA Alaksandr Turčynaŭ.
U pres-słužbie Turčynava rastłumačyli, što havorka idzie tolki pra hruzavyja transpartnyja pieravozki. Mirnyja žychary pa-raniejšamu mohuć svabodna pieramiaščacca praź liniju raźmiežavańnia i pieravozić z saboj asabisty bahaž, piša liga.net sa spasyłkaj na Dziaržpahransłužbu Ukrainy.
Prezident Ukrainy Piatro Parašenka zajaviŭ, što vyklučeńniem pavinny być tolki humanitarnyja hruzy ŭkrainskich i mižnarodnych humanitarnych arhanizacyj, AAN, Mižnarodnaha Kamiteta Čyrvonaha Kryža.
