Dziejnaść prakurorskich rabotnikaŭ złamała losy sotniam ludziej na Minščynie. Pra heta kiraŭnik Minabłvykankama Siamion Šapira zajaviŭ 17 sakavika na kanfierencyi «Aktualnyja pytańni prafiłaktyki pravaparušeńniaŭ», jakaja prajšła ŭ stalicy, pieradaje tut.by.
Kiraŭnik vobłaści paviedamiŭ, što najbolšuju kolkaść pytańniaŭ maje da prakuratury Uździenskaha rajona Minščyny. «Kali ja pryjechaŭ u rajon, to tam była takaja situacyja: u troch kałhasach niama kiraŭnikoŭ, u troch pačatyja kryminalnyja spravy, z astatnich šaści piać drenna pracujuć», — paviedamiŭ Šapira. Pa jaho słovach, na adnaho z samych daśviedčanych staršyniaŭ pačali kryminalnuju spravu, jakuju potym zakryli. Padčas rasśledavańnia čałaviek atrymaŭ infarkt, a ciapier pracuje vartaŭnikom u susiednim kałhasie.
«Kali sprava nie vartaja vyjedzienaha jajka, nie treba tady dureć», — źviarnuŭsia Šapira da prakuroraŭ. Jon raspavioŭ, jak suprać adnaho z kiraŭnikoŭ sielhaspradpryjemstvaŭ kryminalnuju spravu pačynali trojčy. Staršynia abłvykankama navat pryjechaŭ asabista pacisnuć jamu ruku za rabotu, padtrymać.
Raspavioŭ kiraŭnik Minščyny i pra inšy vypadak. Jon sam paprasiŭ daśviedčanaha kiraŭnika sa Ždanovič, jaki zarablaŭ 26 miljonaŭ, uznačalić dva kałhasy va Uździenskim rajonie. Nieŭzabavie na taho pačali kryminalnuju spravu. «Za što? Vyjaviłasia, jon atrymlivaŭ 15—20 miljonaŭ, i žančynu ź ministerstva, jakaja ŭzhadniła hety zarobak, asudzili. Joj dali hod umoŭna, prymusili vypłacić tyja hrošy, jakija byli vypłačanyja staršyni kałhasu. Ale prakuroram hetaha mała, jany patrabujuć, kab hetaj žančynie dali dva hady kałonii», — nie chavaŭ svajho abureńnia Šapira.
U śpisie, jaki padrychtavaŭ staršynia abłvykankama, pa jaho słovach sotni kiraŭnikoŭ Minščyny, na jakich pačynali kryminalnyja spravy, a potym spyniali z-za adsutnaści składu złačynstva ci zaviaršali administracyjnym pracesam.
Pa słovach Šapiry, składam złačynstva moža stać što zaŭhodna. Naprykład, aficyjna staršynia kałhasa nie pracuje pa niadzielach, ale ŭ realnaści jon biare słužbovuju mašynu i jeździć pa palach. A ŭ śledčych pačynajucca da jaho pytańni. Abo zanosić u tabiel nie naležnyja 8 hadzin pracoŭnaha dnia, a kolki pracavaŭ na samaj spravie — 16.
Prakuratura paabiacała razabracca i jašče raz viarnucca da ahučanych kryminalnych spravaŭ.
