18 sakavika ŭ Minsku adbylisia vobšuki na kvaterach Paŭła Buki i Źmitra Kanaplanikava — siabraŭ hramadskaha abjadnańnia «Instytut matematyki i kibiernietyki».
Kali karespandent NN dazvaniŭsia spadaru Buku pieršy raz, słužbovyja asoby vieźli jaho ŭ Minski mižrajonny adździeł Departamienta finansavych rasśledavańniaŭ Kamiteta dziaržkantrolu (vuł. Broŭki, 3/2).
Pryčynaj, pavodle supracoŭnikaŭ DFR KDK, stała padazreńnie ŭ ažyćciaŭleńni adukacyjnaj dziejnaści biez adpaviednaj licenzii.
Na pytańnie, ci jon zatrymany, spadaru Buku adkazali, što pakul nie, tolki «zaprošany».
Pavodle słovaŭ Paŭła Buki, padobnaje «zaprašeńnie» atrymaŭ i jaho kaleha Źmicier Kanaplanikaŭ. Žonka Źmitra, Taćciana Toŭścik, jakaja taksama supracoŭničaje z «Instytutam matematyki i kibiernietyki», zastałasia doma, bo maje na rukach małoje dzicia.
Paśla «ŭziaćcia tłumačeńniaŭ» Buku i Kanaplanikava vypuścili.
«Śledčyja ŭvieś čas sprabavali spravakavać pytańniem: «Jak vy viadziecie adukacyjnuju dziejnaść?» — paviedamiŭ Buka karespandentu NN. — Davodziłasia ŭvieś čas tłumačyć, što adukacyjnaj dziejnaści ŭ Biełarusi my nie viadziem».
Kryminalnaj spravy suprać instytuta, jak jon zrazumieŭ sa słovaŭ śledčych, niama, adnak adznačaje, što siońniašnija dziejańni DFR byli vielmi arhanizavanyja: «Jany skiravali až try hrupy: u miesca, dzie my ładzim biaspłatnyja publičnyja lekcyi, da mianie dadomu i da Kanaplanika. Taksama, nakolki mnie viadoma, jany praviali hutarku z adnym sa studentaŭ». Padčas vobšukaŭ śledčyja vyniali vinčestery kampjuteraŭ i piačatku hramadskaj arhanizacyi. «Dziejnaść instytuta časova paralizavanaja», — adznačyŭ Buka.
Instytut matematyki i kibiernietyki» raspracavaŭ adukacyjnuju prahramu dla biełaruskamoŭnaha navučańnia prahramistaŭ.
U Biełarusi, pavodle słovaŭ Paŭła Buki, mahčymaści dziejničać nie było, tamu jany damovilisia ź Mižnarodnym ekanamična-humanitarnym univiersitetam imia akademika Ściapana Dziemjančuka ŭ Roŭnie (Ukraina). Tam biełaruskamoŭnyja prahramisty vučacca asobnaj płyńniu.
Prahrama doŭžycca ŭžo try hady, štohod na jaje nabirajecca kala 15 zavočnikaŭ, jakija majuć atrymać aficyjny ŭkrainski dypłom.
Navučańnie dla ich u Roŭnie idzie pa-biełarusku, ahulnyja pradmiety, kštałtu historyi Ukrainy, čytajuć pa-ukrainsku.
«Kali z nami niešta zdarycca, dumaju, adzin ź instytutaŭ ci ŭniviersitetaŭ, ź jakimi my damaŭlalisia, zmoža padtrymać hetuju prahramu zamiest nas», — kaža Pavieł Buka.
U Biełarusi siabry hramadskaha abjadnańnia ładzili tolki biaspłatnyja lekcyi.
«My ni ŭ čym nie vinavatyja, — upeŭnieny Pavieł Buka. — My vielmi doŭha dumali, jak arhanizavać našu dziejnaść tak, kab nie parušyć nivodnaha zakona».
