Vioska Karleonie, viadomaja na ŭvieś śviet, dziakujučy ramanu «Chrosny baćka».
Arcybiskup Sicylii Mikiele Penizi zabaraniŭ miascovym mafijozi brać udzieł u chryščeńni dziaciej, kab tym samym jany nie mahli stanavicca «chrosnymi baćkami».
Mikiele Penizi, čyj prychod znachodzicca ŭ pryharadzie stalicy Palerma Manreali, źjaŭlajecca zaŭziatym zmaharom z mafijaj i zajaŭlaje, što choča kinuć vyklik ŭstojlivamu praviłu.
«Mafija pieraniała termin «chrosny baćka» u carkvy, kab nadać svaim vierchavodam areoł relihijnaj značnaści, — cytuje Penizi «Frans-pres». — A na samaj spravie hetyja dva śviety zusim niesumiaščalnyja».
U prychod Penizi ŭvachodzić i sumna viadomaja vioska Karleonie, ušanavanyja ŭ ramanie Marya Pjuza «Chrosny baćka».
U lutym hetaha hoda presa paviedamlała, što Mikiele Penizi rezka asudziŭ śviatara Korleonie za jaho rašeńnie dazvolić synu miascovaha hanhstara Tota Ryina stać chrosnym baćkam svajoj plamieńnicy.
Novy zahad arcybiskupa Penizi zabaraniaje asudžanym za «haniebnyja złačynstvy» vystupać u roli chrosnych baćkoŭ.
Pry hetym arcybiskup pryznaje, što mafijozny «kodeks honaru» ci «amierta» budzie pieraškadžać realizacyi hetaha zahadu.
«Kali niejki čałaviek nie byŭ asudžany, to my nie možam stavicca da jaho [niehatyŭna] na padstavie čutak, biez dokazaŭ», — rastłumačyŭ jon, dadaŭšy, što šlach vypraŭleńnia adkryty dla ŭsich, u tym liku i dla hanhstaraŭ.
«Kali chto-niebudź ź ich pryznajecca, što zrabiŭ niešta drennaje i paprosić prabačeńnia za zroblenaje zło, to ŭ hetym vypadku my možam abmierkavać, jak stać na šlach praŭdzivy», — skazaŭ arcybiskup.
U 2008 hodzie archijepiskapu Penizi pahražali raspravaj paśla taho, jak jon admoviŭsia dazvolić pachavać pa relihijnym abradzie kiraŭnika mafii Kračefisa Emanueła.
Tady palicyja prystaviła da śviatara achovu.
U 2014 hodzie Papa Francišak taksama kinuŭ vyklik arhanizavanaj złačynnaści, adłučyŭšy ad Katalickaj carkvy ŭsich mafijozi.
«Tyja, chto idzie darohaj zła, jak heta robiać mafijozi, nie majuć adzinaj darohi z Boham», — skazaŭ Papa.
