U Viciebskim univiersitecie kirujučuju pasadu dali abaroncy ruskaha śvietu, jakaja pierajechała z Łuhanska

Jak stała viadoma «Našaj Nivie», letaś kafiedru zamiežnych movaŭ Viciebskaha dziaržaŭnaha ŭniviersiteta ŭznačaliła Iryna Zajcava.

Va ŭniviersitecie spn. Zajcava vielmi aktyŭničaje — tak, jana ŭžo adznačyłasia praviadzieńniem sieminara, pryśviečanaha Dniu rodnaj movy. Praŭda, rodnaj movaj čamuści značycca ruskaja.

Chto ž takaja Iryna Zajcava?

Pavialičyć

Naradziłasia jana ŭ Saamskim rajonie Murmanskaj vobłaści Rasii, razam z baćkami nieŭzabavie pierajechała ŭ Łuhansk, a kandydackuju i doktarskuju dysiertacyi abaraniała ŭ Maskvie.

Svaju hramadzianskuju aktyŭnaść pačała prajaŭlać jašče ŭ 1990-ch — jana była funkcyjanieram «Łuhanskaha abłasnoha Rasijskaha centra», uznačalvała Ukrainska-rasijski sajuz, supracoŭničała z «Ruskim błokam» i «Ruskim rucham». 

Takuju prabiŭnuju asobu zaŭvažyli ŭ Partyi rehijonaŭ, ad jakoj jana patrapiła ŭ abłasnuju radu. 

U svajoj navukovaj dziejnaści Zajcava adznačyłasia tym, što budučy zahadčykam kafiedry sacyjalna-humanitarnych dyscyplin Łuhanskaha ŭniviersiteta kultury i mastactvaŭ pieraviała vykładańnie dyscyplin «Historyja Ukrainy» i «Historyja ŭkrainskaj kultury» z ukrainskaj na ruskuju movu, na čym nie spyniłasia i prapanavała fiłołaham vykładać ukrainskuju movu pa-rusku (!), pakinuŭšy pa-ŭkrainsku tolki prykłady. 

Najvyšejšaja pasada Zajcavaj — namieśnica ministra adukacyi Ukrainy pry ministru Tabačniku.

Ź jašče adnaho miesca raboty, Ukrainskaha centra kantrolu jakaści, adukacyi, Zajcavu zvolnili za hrubaje parušeńnie pracoŭnych abaviazkaŭ. 

Nie raz jana nazyvała siabie abaroncaj ruskaha śvietu i ruskaj movy, što faktyčna vykazvałasia ŭ dyskryminacyi ŭsiaho nacyjanalnaha — u sučasnaj terminałohii, Zajcava była va Ukrainie ahientam upłyvu Kramla. 

Voś niekatoryja vykazvańni prafiesarki Zajcavaj. 

«Psichołahi mnohich krain daŭno dakazali, što pry navučańni dziciaci na niarodnaj movie jaho intelektualny patencyjał panižajecca na 45—50%. Va Ukrainie bolšaja častka ludziej ličyć rodnaj movu ruskuju. Vychoŭvajučy dziaciej na čužoj dla ich movie, Ukraina biadnieje i maralna, i duchoŭna», — tak u 2009 hodzie vykazałasia Zajcava pra ŭkrainamoŭnuju adukacyju ŭ Łuhansku padčas kruhłaha stała na temu «Rodnaja mova jak asnoŭny nośbit kulturnaj samaidentyfikacyi nacyi».

Karjera Zajcavaj va Ukrainie skončyłasia pradkazalna. Kala 200 pradstaŭnikoŭ ukrainskaj intelihiencyi napisali adkryty list da rektara Kijeŭskaha piedahahičnaha ŭniviersiteta i ministra adukacyi z prośbaj zvolnić «ahresiŭnuju ŭkrainafobku i karupcyjanierku» z nazvanaha ŭniviersiteta, dzie jana zajmała pasadu vykładčyka. 

Pavialičyć

U vyniku heta i było zroblena — paśla kalektyŭnaha lista z sotniami padpisantaŭ Zajcavu z hańbaj zvolnili z kijeŭskaha ŭniviersiteta. 

Ale čamu jana pajechała ŭ Biełaruś, a nie zastałasia ŭ Łuhansku?

Ci heta vymušany žyćciovy krok, ci pierajezd z kankretnymi, ale cieniavymi metami pa zmahańni ź biełaruskaj kulturaj pa «łuhanskaj schiemie»?

I čamu asobu z takoj adyjoznaj bijahrafijaj prytulili ŭ Viciebsku, dy jašče i dali kirujučuju pasadu?

Pieršy prarektar Vasil Malinoŭski na hetaje pytańnie «Našaj Nivy» nie adkazaŭ, pryznaŭšysia, što nie viedaje nijakich akaličnaściaŭ bijahrafii Zajcavaj.

Sama hetaja vykładčyca akazałasia niedastupnaj praz udzieł u navukovaj kanfierencyi ŭ Połacku. 

• 0
• 0
• 0
• 0
• 0
• 0
• 0
• 0