U Minsku aŭtamabilist napaŭ na dvornika za toje, što toj vyklikaŭ evakuatar na aŭtamabil, jaki zaharadziŭ prajezd. Da bojki dałučyłasia žonka aŭtaŭładalnika. Vypadak adbyŭsia ŭ kancy sakavika, a ciapier pa hetym fakcie viadziecca raźbiralnictva, paviedamili AUTO.TUT.BY u Frunzienskim RUUS.
Incydent adbyŭsia na vulicy Nalibockaj u Kamiennaj Horcy. Dvornik ŽEU № 9 Frunzienskaha rajona Minska Valancin vyklikaŭ evakuatar na aŭtamabil — mašyna zaminała ruchu śmiećciavoza. Aŭtaŭładalnik ubačyŭ evakuatar, vyskačyŭ z chaty i nakinuŭsia na dvornika, raspaviali ŭ Frunzienskim RUUS.
Śledam z padjezda vybiehła žonka aŭtamabilista — jak śćviardžaje sam dvornik, z pradmietam, padobnym da elektrašokiera. Pa fakcie napadu Frunzienskim RUUS pravodzicca pravierka.
Varta zaŭvažyć, što nie tolki ŭkazany aŭtamabilist pakidaje aŭto ŭ nienaležnym miescy. Mnohija kiroŭcy parkujuć aŭto i na vyjezdach, i na zialonaj zonie, i la žoŭtaj raźmietki
Majstar ŽEU № 9 Frunzienskaha rajona Taćciana Machnovič paćvierdziła, što napad na dvornika sapraŭdy byŭ i paśla hetaha Valancin źviarnuŭsia ŭ milicyju. Majstar lubyja inšyja kamientary davać admoviłasia, zhadaŭšy tolki, što dvornika paśla incydentu adchilili ad pracy, a potym znoŭ viarnuli.
Paśla taho, jak historyja atrymała ahałosku, dvornik pierastaŭ davać kamientary: nie žadaje, kab jana stanaviłasia padstavaj dla abmierkavańniaŭ.
— Ščyra kažučy, nie chaču ničoha kazać. Chutčej zabudu, stanie praściej. Chopić taho, što ŭžo jość. Heta majo žyćcio, ja nie chaču, kab u jaho ŭmiešvalisia. Jak jano pavierniecca potym, ja ž nie viedaju. Niachaj milicyja raźbirajecca.
Zatoje miascovyja žychary achvotna iduć na kantakt. U razmovie z AUTO.TUT.BY jany aburalisia, jak možna było źbić čałavieka, i padkreślili, što całkam stajać na baku dvornika.
— Kali Valancina časova adchilili ad pracy, da nas dasłali žančynu-dvornika na zamienu. Dvor u tyja dni zusim nie prybiraŭsia. Ja vychodziła hulać z sabakam i źbirała pa placoŭcy škło. Kali prasiła ab hetym novuju rabotnicu, jana kazała, što heta nie jaje terytoryja. Z Valancinam u nas zaŭsiody čysta. Zimoj nie było ni hurbaŭ u dvary, ni lodu na chodnikach. Ja chadziła ŭ palikliniku praz susiednija dvary, mnie było z čym paraŭnoŭvać.
Ź inšaj dziejučaj asobaj hetaj historyi — aŭtaŭładalnikam, jaki napaŭ na dvornika — ustalavać kantakt nie ŭdałosia. Žychary doma śćviardžajuć, što paśla hetaha vypadku jon tut nie źjaŭlaŭsia. Miarkujuć, što jon zdymaŭ kvateru i paśla incydentu terminova pierajechaŭ. Adnak, jak śćviardžaje adna z žycharak, pieryjadyčna mužčyna ŭsio ž prychodzić: u dvary staić jaho druhaja mašyna — stary Mercedes na spuščanych kołach, jaki vykarystoŭvajecca jak schovišča dla roznych rečaŭ.
