Padkamisija pa pytańniach rasśledavańnia Smalenskaj katastrofy pry Minabarony Polščy ŭpeŭnienaja, što prezidencki samalot TU-154M 10 krasavika ŭ Smalensku raspaŭsia ŭ pavietry. Pra heta ŭ paniadziełak u efiry telekanała TVP Info skazaŭ kiraŭnik padkamisii Vacłaŭ Biarčynski, piša Radyjo Polšča.
Na pytańnie, čym abhruntoŭvajecca takaja vysnova, jon skazaŭ, što śpiecyjalisty ŭvažliva vyvučyli pieramovy piłotaŭ z kamandna-dyśpietčarskim punktam. Pa jaho słovach, frahmienty samalota raźlacielisia na dziasiatki mietraŭ, pierš čym jon upaŭ.
«Samalot pačaŭ raspadacca ŭ pavietry i pačaŭ hublać frahmienty, jakija padali na ziamlu jašče da biarozy. Biaroza nijak nie paŭpłyvała na zychod katastrofy», — skazaŭ jon.
Pry hetym kiraŭnik padkamisii padkreśliŭ, što pryčyny katastrofy pakul zastajucca nieviadomymi.
U svaju čarhu vydańnie Onet, spasyłajučysia na vysnovy kamisii, paviedamlaje, što z samalotam adbyłasia častkovaja defrahmientacyja ŭ 900 mietrach ad linii ŭźlotna-pasadačnaj pałasy aeraporta ŭ Smalensku.
Akramia taho, kamisija ličyć, što dyśpietčary ŭ Smalensku niapravilna viali prezidencki samalot na pasadku. U jakaści prykładu jany pryvodziać trajektoryju źnižeńnia rasijskaha samalota Ił-76, jaki pavinien byŭ pryziamlicca ŭ Smalensku niezadoŭha da polskaha samalota, ale ŭ vyniku palacieŭ na zapasny aeradrom.
Na dumku členaŭ polskaj padkamisii, trajektoryi zachodu na pasadku dvuch samalotaŭ značna adroźnivajucca, što moža śviedčyć ab śviadomym uviadzieńni ŭ zman polskich piłotaŭ.
Nahadajem, abłomki polskaha prezydenckaha samalota, jaki paciarpieŭ krušeńnie 10 krasavika 2010 hoda pad Smalenskam, pa-raniejšamu znachodziacca ŭ Rasii. U katastrofie Tu-154M pad Smalenskam zahinuli 96 čałaviek. Siarod achviar hetaj katastrofy byŭ prezident Polščy Lech Kačyński i jaho žonka, apošni prezident Polščy ŭ vyhnańni Ryšard Kačaroŭski, pradstaŭniki vyšejšaha vajskovaha kamandavańnia, palityčnych partyj, hramadskija i relihijnyja dziejačy.
Ministr nacyjanalnaj abarony Polščy Antoni Maciarevič 4 lutaha 2016 hoda padpisaŭ dakumienty, jakija dali mahčymaść adnavić rasśledavańnie Smalenskaj katastrofy. Pa rašeńni ministra, u ramkach Kamisii dziaržaŭnaj avijacyi pa rasśledavańni avijakatastrof stvoranaja padkamisija, jakaja praviadzie novaje rasśledavańnie katastrofy samalota Tu-154M pad Smalenskam.
