Pamiežniki, palicyjanty i supracoŭniki hramadskaj biaśpieki Litvy 11 krasavika ŭdzielničali ŭ vučeńniach pa adbićci dziejańniaŭ dyviersantaŭ na dziaržaŭnaj miažy, paviedamlaje MUS susiedniaj dziaržavy.
Pratybos Šalčininkuose © DELFI / Andrius Ufartas
Pavodle lehiendy vučeńniaŭ, jakija pravodziacca pa rasparadžeńni ministra ŭnutranych spraŭ Ejmucisa Misiunasa, śpiecyjalnyja siły varožaj Litvie dziaržavy Udzija nielehalna pierasiekli miažu i źbirajucca zaniać adnu z pamiežzastaŭ, a taksama kamisaryjat palicyi Salečnikaŭ.
Paśla taho, jak siły Udzii byli zaŭvažanyja, na pamiežnym učastku źnikła radyjosuviaź. Psieŭdadyviersantam, jakija imitavali ŭvarvańnie kala tryccaci dyviersantaŭ, udałosia zaniać kamisaryjat palicyi. Bolš za dziesiać palicejskich padčas uvarvańnia byli «zabityja». Pradstaŭniki MUS skazali BNS, što pakul nie mohuć nazvać kolkaść zadziejničanych u vučeńniach supracoŭnikaŭ sistemy US, tamu što vučeńni jašče nie skončylisia. «My chacieli ŭ realnych umovach pahladzieć, jak na takuju ekstremalnuju situacyju buduć reahavać litoŭskija słužby. Pra vučeńni zahadzia było paviedamlena tolki kiraŭnictvu palicyi, Słužbie achovy dziaržmiažy Litvy i Słužbie hramadskaj biaśpieki. Šarahovyja supracoŭniki, apieratary Adzinaha centra dapamohi zahadzia nie viedali, što heta vučeńni», — skazaŭ ministr US.
Pa słovach ministra, važna było pravieryć, jak słužby zdolnyja ŭzajemadziejničać pamiž saboj, abmieńvacca infarmacyjaj va ŭmovach adsutnaści suviazi, kali infarmacyja ab vyłazcy dyviersantaŭ dajšła da MUS.
Acenka vynikaŭ vučeńniaŭ budzie dadziena paśla rapartaŭ kiraŭnikoŭ usich słužbaŭ i abmierkavańnia. «Heta byli nie pakazalnyja vučeńni, na ich nie było ni stralby, ni dymu. Takija varožyja siły pierasoŭvalisia by cicha i chutka, tamu vielmi važna było b ich svoječasova zaŭvažyć, paviedamić ab ich pieramiaščeńni i adekvatna reahavać», — skazaŭ E. Misiunas.
Jak adznačyŭ časovy kiraŭnik palicyi, nazirajučy imitacyju złačynnych dziejańniaŭ, niekatoryja žychary źviarnulisia ŭ Centr ahulnaj dapamohi (CAD). E.Misiunas ž, u svaju čarhu, adznačyŭ, što CAD nie pieradaŭ nijakaj infarmacyi ab incydentach, a heta, pavodle jaho słoŭ, demanstruje, što žychary, jakija bačyli «zialonych čałaviečkaŭ», nie patelefanavali pa numary 112. Pres-sakratar CAP paviedamiła BNS, što byli atrymany zvanki žycharoŭ padčas vučeńniaŭ, adnak śpiecyjalisty inšych słužbaŭ pra heta nie infarmavali, pakolki ludzi nie prasili ab dapamozie.
Sistema US Litvy zaniepakoiłasia hibrydnymi pahrozami paśla ažyćcioŭlenaj u 2014 hodzie Rasijaj anieksii Kryma. «Zialonymi čałaviečkami» byli nazvany rasijskija vajskoŭcy, jakija ŭ 2014 hodzie pačali anieksiju Krymskaha paŭvostrava. Usio ž ministr nie paćvierdziŭ, što padčas vučeńniaŭ rychtavalisia supraćstajać mienavita rasijskim dyviersantam.
