Pradstaŭniki niezaležnych prafsajuzaŭ, jakija ŭvachodziać u skład Biełaruskaha kanhresu demakratyčnych prafsajuzaŭ (BKDP), paćvierdzili namier pravieści ŭ Mižnarodny dzień salidarnaści pracoŭnych 1 maja sumiesny marš, paviedamlaje Radyjo Svaboda.
Siońnia zajaŭnik Maršu salidarnaści — Biełaruski kanhres demakratyčnych prafsajuzaŭ padaŭ zajaŭku ŭ Minski harvykankam. Arhkamitet abraŭ miescam zboru ŭdzielnikaŭ placoŭku kala Akademii navuk. Maršrut šeścia da płoščy Banhałor, dzie maje adbycca i mitynh.
Adkaznymi za akcyju pryznačanyja namieśnik staršyni BKDP Siarhiej Antusievič, staršynia Svabodnaha prafsajuza mietalistaŭ Alaksandr Buchvostaŭ i kiraŭnik niezaležnaha prafsajuzu Mikałaj Zimin.
Mierapryjemstva budzie pryśviečana abaronie praŭ pracoŭnych i sacyjalnaj spraviadlivaści. U pryvatnaści, jaje ŭdzielniki buduć vystupać suprać tak zvanaha «darmajedskaha» dekreta № 3.
Čas praviadzieńnia Maršu salidarnaści, zhodna z zajaŭkaj — 1 maja, pačatak u 16 hadzin. Šeście — ad 16:30 da 17:30, mitynh — ad 17:30 da 19:30.
U arhkamitet, akramia prafsajuzaŭ, taksama ŭvajšli Abjadnanaja hramadzianskaja partyja, partyja «Spraviadlivy śviet», Biełaruskaja chryścijanskaja demakratyja, Partyja pracoŭnych, Biełaruskaja žanočaja partyja «Nadzieja», ruch «Za svabodu».
