Biełaruskija pravaachoŭniki niadaŭna zatrymali staršyniu rady dyrektaraŭ chołdynhu Yaraw Ernesta Alaksiejeva.
Aficyjny pradstaŭnik Śledčaha kamiteta Julija Hančarova paviedamiła ŭ svaim fejsbuku, što Śledčym kamitetam rasśledujecca kryminalnaja sprava ŭ dačynieńni da Ernesta Alaksiejeva. Sprava zaviedzienaja hienieralnaj prakuraturaj Respubliki Biełaruś pa č. 2 art. 216 (Pryčynieńnie majomasnaj škody biez prykmiet kradziažu) Kryminalnaha kodeksa Biełarusi. Padazravany zatrymany. Pravodziacca nieabchodnyja śledčyja dziejańni.
Tut.by paviedamlaje, što kampanija Yaraw vyjšła ź viadomaj hrupy «Jaravit», zasnavanaj Andrejem Birukovym i jaho partniorami. Kampanija z 1997 hoda pracavała na rynku Turkmienistana. Za minuły čas «Yaraw» staŭ bujnym pastaŭščykom hruzavoj, pasažyrskaj i śpiectechniki MAZa, «Amkadora», HAZa, KrAZa dy inšych marak u Siaredniuju Aziju.
Pa słovach krynic Tut.by u Turkmienistanie, raniej Alaksiejeŭ «byŭ adzinym pravajdaram biełaruskich intaresaŭ» u hetaj krainie. Zaraz tam źmianiajecca pravajdar intaresaŭ, ale surazmoŭca ličyć, što «Alaksiejeŭ prosta tak ničoha nie addaść». Tym bolš što jaho dziejnaść nie abmiažoŭvałasia tolki pastaŭkami biełaruskaj techniki. Byli jašče i handal naftapraduktami, charčavańniem i hetak dalej.
Jašče adzin surazmoŭca skazaŭ, što biznesoŭca zrabili «kazłom adpuščeńnia ŭ niaprostych biełaruska-turkmienskich adnosinach». «Reč tam vidavočna pryciahnutaja. Chaj siłaviki b pasprabavali vieści biźnies u pustyni, a potym šukali b vinavatych», - adznačyŭ znajomy Alaksiejeva.
Uletku 2014 hoda tahačasny premjer-ministr Michaił Miaśnikovič i prezident Turkmienistana damovilisia chutčej pabudavać servisny centr u Ašchabadzie. Płanavałasia, što ŭ centry buduć pradavać i absłuhoŭvać biełaruskuju techniku, handlavać zapčastkami i rychtavać kadry (kiroŭcaŭ, miechanikaŭ, elektrykaŭ).
Ahulnaja terytoryja centra składała 22 tys. kv. m. Košt prajektu aceńvaŭsia ŭ 10,5 młn dalaraŭ. Zdać centr płanavałasia ŭ śniežni 2015 hoda. Alaksiejeŭ zapeŭnivaŭ, što vytrymać paznačanyja terminy pry rytmičnym finansavańni realna. Biznesmen vykazvaŭ nadzieju, što ŭ budučyni centry pa absłuhoŭvańni biełaruskaj techniki buduć stvorany ŭ kožnym rehijonie Turkmienistana.
Ernest Alaksiejeŭ (u centry) pakazvaje Michaiłu Miaśnikoviču, jak budzie vyhladać novy servisny centr
U kancy sakavika hetaha hoda prezidenty Biełarusi i Turkmienistana adkryli kalijny kambinat i budynak biełaruskaha pasolstva. A voś servisny centr tak i nie byŭ pabudavany ŭ poŭnym abjomie. Choć z 2010 pa 2016 hod u Turkmienistan pastupiła bolš za piać z pałovaj tysiač adzinak techniki Minskaha aŭtazavoda na sumu zvyš 400 młn dalaraŭ. Prykładna takuju ž kolkaść adzinak techniki i zapasnych častak pastaŭlaje ŭ Turkmienistan Minski traktarny zavod, kanstatavaŭ padčas niadaŭniaj sustrečy ź biełaruskaj delehacyjaj Hurbanhuły Bierdymuchamiedaŭ. Jon adznačyŭ, što ŭ krainie jość patreba ŭ jakasnym i svoječasovym absłuhoŭvańni biełaruskaj techniki.
***
Niekalki hadoŭ tamu imia Ernesta Alaksiejeva prahučała ŭ suviazi z rezanansnaj avaryjaj padčas nielehalnych honak na trasie, jakaja viadzie ŭ Nacyjanalny aeraport.
Bentley, jaki imčaŭsia na vielizarnaj chutkaści, urezaŭsia ŭ stareńki «Falksvahien», jaki razvaročvaŭsia praz raździalalnuju zonu. Paśla ŭdaru Bentley urezaŭsia jašče ŭ try mašyny i zahareŭsia. Pa źviestkach kp.by za rulom premijalnaha aŭto znachodziŭsia Ernest Alaksiejeŭ. Vinavatym u DTZ pryznali kiroŭcu «pasata», a biznesmen kupiŭ sabie novy ŭsiedarožnik.
Na M2 la aeraporta zhareŭ «Bentli». Na chutkaści 250 ulacieŭ na nielehalnyja honki
Miljon za kvateru. Žychary harhary Čyža: chto jany?
