Kultavy amierykanski kinarežysior Devid Linč abviaściŭ, što paśla vychadu na teleekrany ŭsich sieryj novaha «Tvin Piks» pierastanie zdymać kino, paviedamlaje VVS.
Getty
U hutarcy z aŭstralijskim vydańniem Sydney Morning Herald aŭtar «Dzikich sercam», «Šaša ŭ nikudy» i «Małchołand Drajv» skazaŭ, što jaho apošnim prajektam na vialikim ekranie tak i zastaniecca psichałahičny tryler «Unutranaja impieryja» 2006 hoda.
«Mnohaje źmianiłasia: stolki cudoŭnych filmaŭ pravalilisia ŭ prakacie, a toje, što źbiraje kasu — nie toje, čym ja chacieŭ by zajmacca», — raskryŭ svaju dumku pastanoŭščyk.
Pry hetym kultavy sieryjał Devida Linča «Tvin Piks» z pačatku 90-ch vierniecca na ekrany 21-22 maja z novym siezonam paśla premjery na Kanskim fiestyvali.
Pieršaja poŭnamietražka 71-hadovaha ciapier aŭtara — «Čałaviek-słon» — pabačyła śviet u 1977 hodzie. Užo tady vyjaviŭsia jaho unikalny styl.
«Idei — jak dary, jany dyktujuć usio. Ty idzieš za idejaj i ŭžo nie turbuješsia pra formu i niejkija tam praviły, ty zastaješsia viernym svaim dumkam», — raskryŭ Linč svoj pohlad na tvorčaść.
«Dzikija sercam» ŭ 1990 hodzie prynieśli režysioru «Załatuju palmavuju halinu» ŭ Kanach. Za ŭsiu karjeru Linča čatyry razy naminavali na «Oskar». Akramia kiniematohrafa, Linč taksama zachaplajecca muzykaj, fotaprajektami z vysokaj modaj i transcendentalnaj miedytacyjaj.
