U Francyi pryniaty zakon, jaki zabaraniaje vykarystańnie dla modnych pakazaŭ i rekłamnych zdymak praźmierna chudych madelek.
Miera pradyktavana kłopatam pra zdaroŭje jak samich madelek, tak i astatnich hramadzian, pierš za ŭsio maładych žančyn, zajaviła ŭ piatnicu ministr achovy zdaroŭja Marysol Turen.
Pavodle jaje słoŭ, nienaturalnyja i nierealistyčnyja standarty pryhažości raźvivajuć u mnohich ź ich kompleks niepaŭnavartaści, što, u svaju čarhu, viadzie da chraničnaha niedajadańnia.
Zhodna z novymi praviłami, pry ŭładkavańni na pracu madel pavinna budzie pradastavić daviedku ad doktara ab stanie zdaroŭja, u tym liku pra toje, što jaje indeks masy cieła (suadnosiny vahi i rostu) znachodzicca ŭ miežach normy.
Za nievykanańnie zakona pracadaŭcam pahražaje štraf da 75 tysiač jeŭra abo źniavoleńnie na termin da šaści miesiacaŭ.
Novyja praviły ŭstupiać u siłu 1 kastryčnika.
U 2015 hodzie, kali adpaviednaja zakanadaŭčaja inicyjatyva była ŭniesienaja ŭ parłamient, prapanoŭvałasia prapisać indeks masy cieła madelaŭ u narmatyŭnym akcie, ale paśla piarečańniaŭ madelnych ahienctvaŭ patrabavańni źmiakčyli, daŭšy ŭračam prava samastojna vyrašać, što niebiaśpiečna dla zdaroŭja, i što nie.
Fatahrafii madelek, źmienienyja pry dapamozie fotašopu, pavinny buduć nieści markiroŭku: «zdymak adretušavany».
Padobnyja normy ŭ apošnija hady byli pryniatyja ŭ Italii, Ispanii i Izraili.
Pavodle źviestak miedykaŭ, zvyš 30 tysiač francuzaŭ pakutujuć na anareksiju, kala 90% ź ich - maładyja žančyny.