Mierkavany vinoŭnik śmiarotnaha DTZ u Minsku nikoli nie atrymlivaŭ paśviedčańnia kiroŭcy. Pra heta paviedamiŭ aficyjny pradstaŭnik USK pa horadzie Minsku Alaksiej Klimovič.
sk.gov.by
Upraŭleńnie Śledčaha kamiteta pa horadzie Minsku praciahvaje vyśviatleńnie abstavin darožna-transpartnaha zdareńnia, u vyniku jakoha zahinuła žančyna 1984 hoda naradžeńnia.
Śledstva vyśvietliła, što 7 maja kala 22.00 kiroŭca aŭtamabila BMW, ruchajučysia pa vulicy Sołtysa z boku Vaŭpšasava, učyniŭ najezd na žančynu z dačkoj, jakija pierachodzili pa rehulavanym pierachodzie na dazvalalny sihnał śviatłafora. Paśla čaho ŭrezaŭsia ŭ tralejbus, jaki stajaŭ u susiedniaj pałasie. U vyniku DTZ žančyna zahinuła na miescy. Dziaŭčynka 2014 hoda naradžeńnia znachodzicca ŭ špitali, jaje žyćciu ništo nie pahražaje.
«Kiroŭca i try pasažyry aŭtamabila padčas avaryi byli ŭ stanie ałkaholnaha apjanieńnia. Ciapier usie čaćviora z paškodžańniami roznaj stupieni ciažkaści znachodziacca ŭ balnicy. Pieršapačatkovymi śledčymi dziejańniami vyjaŭlena, što za rulom BMW znachodziŭsia žychar Pinska 1987 hoda naradžeńnia. Jon zatrymany. Śledstvam atrymanyja danyja, što padazravany nie mieŭ prava kiravańnia transpartnym srodkam. Paśviedčańnie kiroŭcy nikoli nie atrymlivaŭ. Raniej nieadnarazova sudzimy. Praviedzieny ahlad pakazaŭ, što ŭ momant avaryi ŭ kryvi mužčyny było 1,5 pramile ałkaholu», — raspavioŭ Alaksiej Klimovič.
Rasśledavańnie pa kryminalnaj spravie praciahvajecca.
