14 traŭnia ŭ Londanie byŭ vyśviačany na dyjakana Siarhiej Stasievič – haduniec papskaj Hreckaj kalehii ŭ Rymie i były supracoŭnik vydaviectva «Pro Christo».
Momant rukapakładańnia. Sprava — ajciec Nadsan, źleva — biskup Chamnycki.
14 traŭnia ŭ Londanie byŭ vyśviačany na dyjakana Siarhiej Stasievič – haduniec papskaj Hreckaj kalehii ŭ Rymie i były supracoŭnik vydaviectva «Pro Christo».
Uračystyja abrady raspačalisia dniom raniej, padčas adviedvańnia Biełaruskaj katalickaj misii ŭ paŭnočnym Londanie Paŭłam Chamnyckim OSBM, biskupam Stemfardzkim (Ukrainskaja katalickaja carkva ŭ ZŠA). Biskupa Paŭła sardečna pryvitaŭ a.Alaksandar Nadsan – apostalski vizytatar dla biełarusaŭ-katalikoŭ u zamiežžy. U zvarocie da prysutnych a.Nadsan zaznačyŭ, što nadychodziačyja śviatarskija paśviačeńni Siarhieja Stasieviča – heta asabliva radasnaja i važnaja padzieja, čakać jakoj u Londanie daviałosia 25 hadoŭ. U biełaruskaj carkvie Śv.Piatra i Paŭła Siarhiej Stasievič atrymaŭ ad biskupa Paŭła paśviačeńni ŭ čytalnika i subdyjakana.
U niadzielu 14 traŭnia ŭ londanskaj ukrainskaj katedry Śviatoje Siamji na Vyhnańni biskup Chamnycki ŭznačaliŭ prynahodnuju śviatuju liturhiju, udzieł u jakoj uziaŭ taksama a.Nadsan, a peŭnyja častki nabaženstva hučali pa-biełarusku. U časie hetaj liturhii biskup Pavał rukapakłaŭ Siarhieja Stasieviča na dyjakana. U zvarocie da viernikaŭ Ukrainskaj katedry i šmatlikich haściej ź biełaruskaj hramady biskup Pavał skazaŭ, što ŭkrainskaja carkva praciahnuła ruku bratniaj dapamohi biełaruskim hreka-katalikam, jakija dahetul nia majuć ułasnaha biskupa ani ŭ Biełarusi, ani ŭ zamiežžy. Jon pavinšavaŭ ajca dyjakana Stasieviča sa śviačeńniami i dadaŭ, što nastupnymi krokami stanuć vyśviačeńnie dyjakana Stasieviča na preźbitara – a niekali, mahčyma, i na biskupa – dla duchoŭnaha słužeńnia biełarusam u zamiežžy i na Baćkaŭščynie.
Paśla nabaženstva ajca dyjakana Siarhieja Stasieviča dy a.Alaksandra Nadsana na prystupkach katedry sustrakała i ščyra vinšavała biełaruskaja hramada. Biełarusy Vialikabrytanii sardečna dziakavali biskupu Paŭłu za jaho razumieńnie duchoŭnych patrebaŭ biełarusaŭ i čynnuju dapamohu. Vyśviačeńnie novaha biełaruskaha śviatara ŭ Vialikabrytanii – heta padzieja, duchoŭny sens jakoj siahaje daloka pa-za miežy ŭłasna supolnaści biełaruskich katalikoŭ u hetaj krainie.
Anton Zapałota
❏
Siarhiej Stasievič naradziŭsia ŭ 1978 h. u Ivacevičach na Bieraściejščynie. Padčas studyjaŭ u BDU dałučyŭsia da Katalickaj carkvy ŭ parafii Maci Božaj Niastomnaj Dapamohi ŭ Miensku. Pry padtrymcy rektara Biełaruskaj katalickaj misii ŭ Londanie ajca Alaksandra Nadsana jon byŭ pryniaty ŭ Hreckuju kalehiju ŭ Rymie, dzie i prachodziŭ farmacyju da śviatarstva. Siarhiej Stasievič atrymaŭ stupień bakalaŭra tealohii ŭ papskim Universytecie śviatoha Tamaša Akvinskaha «Andželikum» u 2004 h.
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary