Biełaruś — kraina śvietłych idej i prostych elehantnych rašeńniaŭ. Skazali naviersie pačynać školnyja zaniatki ŭ 9 ranicy - i ŭžo daktary ź piedahohami raspaviadajuć, jak heta dobra i pravilna (jak raniej nie dadumalisia — zahadka). Skazali usich pracaŭładkavać da vyznačanaj daty — pracaŭładkavali. Na papiery.
Skazali źmianić uładu ŭ spartyŭnych fiederacyjach - naohuł nie pytańnie. Pamiatajecie dvuch z kuferka, jakija ŭ mulciku dahadžajuć kapryznamu maleńkamu Voŭku? Nu voś uvieś naš dziaržaparat pa svaim funkcyjanale nahadvaje hetuju paračku. Atrymali zadańnie — skazali «aha!» — niešta pa-chutkamu zbacać — a vy tam ździŭlajciesia. Pryčym zbacać navat nie dla Voŭki, a naohuł niezrazumieła dla kaho.
Mahčyma, ja pamylajusia i čahości nie razumieju, ale davajcie voźmiem pierastanoŭki ŭ fiederacyjach, jakija navidavoku. U čym ich sens?
U bijatłonie staršynia KDB Valeryj Vakulčyk pieradaŭ paŭnamoctvy Andryjanu Cybulskamu, jaki ŭ zbornaj užo šmat hadoŭ. Voś tak abnaŭleńnie! Pryčym staršynia KDB uznačaliŭ niejki naziralny saviet.
U tenisie naohuł usio dobra. Radujuć i mužčynskaja zbornaja, i tym bolš žanočaja. Biźniesmien Alaksandr Šakucin staviŭsia da spravy z sercam, ale pracu treba pravieści — i voś užo na čale fiederacyi staić Siarhiej Ciacieryn. Jašče adna «novaja ruka», jak i Natalla Cylinskaja, jakaja nie pieršy hod padymaje viełasport.
Mahčyma, i Vakulčyku, i Šakucinu nie patrebna fiederacyjnaja rucina, mahčyma, ich zaniataść u inšych śfierach spyniaje niejkija pracesy. Ale naŭrad ci hetyja dvoje adyduć daloka ad bijatłona i tenisa. I pierastanoŭki, jakija adbylisia ŭ fiederacyjach, užo sapraŭdy nie ciahnuć na «surjoznaje pierafarmatavańnie» i «kapitalnaje pieratresvańnie», jakija anansavaŭ Alaksandr Łukašenka. Heta tak, kaśmietyka.
Ładzić kapitalnaje pieratresvańnie źvierchu naohuł ciažka, asabliva kali adkazvaješ ŭ krainie za ŭsio.
Bolš naturalna, kali pracesy iduć ŭnutry arhanizacyj - kali tam źjaŭlajucca novyja idei i novyja lidary, kali tam jość kankurencyja. Tak pieramieny vyhladajuć arhanična i dorać niejkuju nadzieju. A tak heta čarhovy maštabny ekśpierymient i praktykavańnie ŭ pierasadžvańni kvietak u miežach adnoj kłumby. Čakać, što astra raptam stanie ružaj, naiŭna.
Zrešty, novych lidaraŭ i idej niama nie tolki ŭ sporcie. Čamu tam pavinna być inakš?
A jašče nadakučyli razmovy pra toje, chto ŭsio ž taki pavinien kiravać fiederacyjami. Paśpiachovyja ŭ minułym spartsmieny ci čynoŭniki z administracyjnym resursam? Boh jaho viedaje, z čaho pavioŭsia taki zvužany vybar, ale nas čamuści ŭvieś čas kidaje ŭ krajnaści. Abo paŭsiul čynoŭniki, ci raptam spartsmienaŭ na carstva. Ale ž pa-dobramu ŭsio prosta: kiravać pavinny tyja, chto prynosić karyść - u kaho jość idei, prychilniki, umieńnie znachodzić mahčymaści. I pofih, spartsmien heta, čynoŭnik abo ŭ niadaŭnim minułym pastuch. Ale chłopcy z kuferka ŭžo skazali «aha!».
Niešta padobnaje na realnyja vybary niespadziavana zdaryłasia ŭ fiederacyi fiechtavańnia. Tam znajšoŭsia čałaviek, jaki pierakanaŭ svaimi prapanovami za jaho prahałasavać. Ale ŭsio skončyłasia sumna. Čałaviek nie byŭ uzhodnieny naviersie, a niaŭzhodnienyja ludzi, jak i ich idei, nie patrebnyja. Na žal, i hetaja historyja nie tolki pra sport.
I naprykancy śviežaje ŭražańnie ad dziaržaŭna-spartyŭnaha «partniorstva» - narady ŭ prezidenta pa pytańniach chakieja.
Ministr unutranych spraŭ, eks-hubiernatar i trenier, što hienieruje vypadkovyja idei, abmiarkoŭvali samuju važnuju prablemu dla krainy. I dobra b prydumali niešta tałkovaje, ale nie — spradviečnaja šarmanka. U vačach spartsmienaŭ zielanina, u vačach prezidenta — lichamankavaja praha vyniku, kab paradavać narod (o, jak ža jon uzradujecca!). I nivodnaj tałkovaj prapanovy, jak hetaha možna dasiahnuć choć by ŭ siarednieterminovaj pierśpiektyvie.
Kali z padobnaj kreatyŭnaściu abmiarkoŭvajucca i niespartyŭnyja prajekty, heta naohuł biada.
