U pačatku prahramy vyrašalnych zajezdaŭ biełaruski Volha Klimava i Nadzieja Makarčanka prademanstravali svaje spryntarskija jakaści na karotkaj dystancyi 200 m u kanoe i zaniali pieršaje miesca - 45,86 siek. Za biełaruskim duetam finišavali kanadki Nadzia Krosman-Sierb i Channa Makintoš, trecimi ŭ vynikovym pratakole apynulisia ispanki Adryjana Paniahua i Patrysija Koka, paviedamlaje BiełTA.
Na najvyšejšuju prystupku pjedestała honaru ŭ kanoe-dvojcy na dystancyi 500 m padnialisia biełaruski Alena Nazdrova i Kamiła Bobr, pakazaŭšy vynik 2 min. 05,38 siek. Druhoje miesca zaniaŭ duet ź Vienhryi Virah Bała i Kinšo Takaš. Bronzavymi pryziorami stali Volha Klimava i Nadzieja Makarčanka, jakija hadzinaj raniej pieramahli na 200 m.
Srebranaj uznaharody siońnia ŭdastoilisia Alena Nazdrova ŭ kanoe na 200 m, jaje siabroŭka pa kamandzie Kamiła Bobr finišavała čaćviortaj. Druhoje miesca taksama na rachunku Arcioma Kozyra na dystancyi 200 m u kanoe, jon sastupiŭ tolki daśviedčanamu Marcinu Fuksu z Čechii.
Taksama siońnia biełaruski viaślar Aleh Jurenia zavajavaŭ druhi załaty miedal. Na samaj doŭhaj dystancyi ŭ 5000 m u bajdarcy biełarus na paŭtary siekundy apiaredziŭ datčanina Rene Poŭlsena. Treciaje miesca zaniaŭ francuz Sirył Kare.
Za dzień da hetaha biełaruskaja kamanda pa viesłavańni na bajdarkach i kanoe zavajavała try załatyja ŭznaharody. U bajdarcy-adzinočcy na 1000 m pieramoh Aleh Jurenia, Volha Chudzienka stała najlepšaj u viesłavańni na bajdarcy na 500 m. U kanoe Alena Nazdrova stała pieršaj na dystancyi 500 m.
Usiaho biełaruskaja kamanda pa viesłavańni na bajdarkach i kanoe zavajavała ŭ Białhradzie siem załatych, dźvie siarebranyja i adnu bronzavuju ŭznaharodu.
Etap Kubka śvietu pa viesłavańni na bajdarkach i kanoe ŭ stalicy Sierbii źjaŭlajecca dobraj pravierkaj sił dla biełarusaŭ pierad hałoŭnymi startami siezonu - čempijanatam Jeŭropy ŭ bałharskim Płoŭdzivie (10-17 lipienia) i suśvietnym forumam vieślaroŭ ŭ českim Račycy (21-28 žniŭnia).
