Andrej Kamaroŭ.
Śvietły dvuchpaviarchovik terasoftaŭcaŭ staić amal na bierazie Ślapianskaha kanała. Kamanda pierasialiłasia ŭ novaje žytło ŭ kastryčniku i tamu jašče nie da kanca abžyłasia, ale hałoŭnyja ŭmovy dla pracy tut jość: kampjutary, mikraskopy, abstalavanaja kuchnia dy nievialikaja spartyŭnaja zała z kikieram, kab rassłabicca.
Na ŭvachodzie nas sustrakaje pryparkavany rovar z naklejkaj «Pahoni» dy dyrektar Andrej Kamaroŭ. «My tut, možna skazać, stvaryli paralelny suśviet», — žartuje jon. I ŭ jaho słovach jość niejki sens: zdavałasia b, što dziŭnaha ŭ biełaruskamoŭnaj kantory? Ale ŭ siońniašniaj realnaści heta, na žal, redkaść.
«Heta sapraŭdy byŭ dla mianie ekśpierymient: pasprabavać vieści dakumientacyju i kamunikacyju na movie. I ja pasprabavaŭ. A ciapier atrymlivaju zadavalnieńnie ad taho, što adbyvajecca. Dziŭna, kaniečnie, kazać pra heta ŭ takim kantekście, bačyć, jak adny nie viedajuć movy, a inšyja ŭvohule hrebliva da jaje staviacca, bo my ž — biełarusy, i heta ŭsio naturalnyja rečy…», — raskazvaje Andrej.
Pry hetym sam jon hadavaŭsia ruskamoŭnaj siamjoj, chadziŭ u takija ž škołu i ŭniviersitet.
Asablivych ciažkaściaŭ ź pierakładam dakumientaŭ nie adčuli: u kampanii pakul pracuje 13 čałaviek (5 raspracoŭščykaŭ i 8 testavalnikaŭ), tamu abarot nievialiki. Samym składanym było znajści takich ža idejnych ludziej, jakija b nie tolki viedali movu, ale i byli prafiesijanałami. Andrej rabiŭ heta z dapamohaj pryvatnych kanałaŭ i prosta daŭšy abjavy na papularnyja pošukaviki pracy. Jon, vidać, navat nie čakaŭ, što nabiare kamandu tak chutka. A ludzi, jakija pryjduć da jaho, buduć udziačnyja za toje, što jon daŭ im mahčymaść siabie nie łamać.
Voś tolki niekalki historyj.
«U inšaj kampanii mianie paprasili razmaŭlać «normalno», kali ja adkazaŭ pa-biełarusku»
Uładzisłaŭ Hiedviła.
Uładzisłaŭ Hiedviła pryjšoŭ u «Terasoft» adnym ź pieršych: «Ja źmianiaŭ pracu i paralelna z vakansijaj prahramista ŭ «Terasoft» razhladaŭ jašče adnu. Ale kali adkazvaŭ pradstaŭniku alternatyŭnaj kampanii pa-biełarusku, mianie pasłuchali, a ŭ kancy hutarki spytali, ci mahu ja «hovoriť normalno». Paśla hetaha moj vybar byŭ vidavočny».
Uładzisłaŭ rodam z Salihorsku. Razmaŭlać pa-biełarusku pačaŭ hadoŭ u 20: prosta razharnuŭ niejkuju knižku i zrazumieŭ, što čytaje na biełaruskaj u razy marudniej, čym na ruskaj. «Mianie heta vielmi ŭzrušyła, i ja zachacieŭ vypravić situacyju: pačaŭ udaskanalvać viedy, čytaŭ knižki, biełaruskamoŭnyja vydańni, raźbiraŭ pravapis. Nu i razmaŭlaŭ kožny dzień, kab praktykavacca».
Zaraz jon pierachodzić na ruskuju, tolki kali sutykajecca z surazmoŭnikami, dla jakich tak bolš kamfortna. I vielmi ciešycca tamu, što na pracy takoj prablemy niama.
«Aśmieliŭsia całkam pierajści na movu paśla padziej 2010-2011 hadoŭ»
Vadzim Ščahłoŭ.
Vadzim Ščahłoŭ pachodzić z Mastoŭskaha rajona Hrodzienskaj vobłaści. U vioscy jon chadziŭ u biełaruskamoŭnuju škołu. Tamtejšyja vykładčyki choć i pierachodzili na ruskuju, jak tolki zakančvalisia zaniatki, ale jany ŭsio-taki dali chłopcu vydatnuju bazu, jakaja dapamahła na chimfaku BDU kanśpiekty ź lekcyj, što dyktavalisia pa-rusku, zapisvać na movie.
«Išła viasna 2011 hoda, u dadatak da padziej tych hadoŭ ja pieračytaŭ knižku Karatkieviča «Kałasy pad siarpom tvaim», natchniŭsia i ŭ niejki momant zrazumieŭ, što viartacca da ruskaj nie chaču».
Adpracoŭvajučy raźmierkavańnie chimikam, dzie treba było daśledavać farby i palimiery, u volny čas chłopiec vyvučaŭ prahramavańnie. Praź niekatory čas Vadzim ubačyŭ vakansiju ŭ «Terasoft», i ŭ jaho adrazu zaharelisia vočy: «Ja navat jašče nie viedaŭ svaich budučych abaviazkaŭ, ale ŭžo maryŭ stać častkaj takoha kalektyvu». Uličvajučy, što chłopiec prychodzić na pracu navat z hipsam (dniami Vadzim parvaŭ na nazie źviazki), možna skazać, što jon abraŭ dla siabie pravilnaje, lubimaje miesca.
«Mianie vielmi ŭzrušyła mahčymaść pracavać u cikavaj śfiery i pry hetym zastavacca biełaruskamoŭnaj»
Kryścina Kimajeva.
Kali b nie muž, jaki zaŭvažyŭ ŭ Kryścinie Kimajevaj zdolnaści da testavańnia, jana, moža, i da hetaha času pracavała b u škole. Dziaŭčyna skončyła linhvistyčny ŭniviersitet i mienavita tam pačała razmaŭlać pa-biełarusku: «Tak supała, što dziaŭčaty, ź jakimi ja žyła ŭ studenckim internacie, byli vielmi idejnyja. Na niejkim etapie my vyrašyli razmaŭlać na movie ŭ miežach svajho pakojčyka, potym hetym zacikaviłasia jašče bolš ludziej — tak jano ŭsio i zakruciłasia». Da hetaha adzinymi, chto moh padtrymlivać ź joj hutarku, byli baćki: «praŭda, u ich byŭ svoj, viaskovy i dušeŭny varyjant movy».
U kaledžy śfiery absłuhoŭvańnia, dzie jana vykładała anhlijskuju ciaham raźmierkavańnia, takoha asiarodździa, jak u VNU, nie było. Škoła tolki cisnuła svaimi abaviazkami pa naviazvańni ideałohii i masavych mierapryjemstvaŭ. Paralelna pa paradzie muža jana zapisałasia na kursy testavalnikaŭ. I kali pryjšoŭ čas abirać novuju pracu, taksama ŭbačyła vakansiju ŭ «Terasoft» i bolš užo nie chacieła šukać inšyja varyjanty: «Kali b daviałosia rabić u inšym miescy, mnie b pryjšłosia abo padstroicca pad kalektyŭ i pierajści na ruskuju movu, abo pryncypova być saboj, razumiejučy, što heta budzie tarmazić pracu. Tamu mianie vielmi ŭzrušyła mahčymaść być častkaj cikavaj śfiery i pry hetym zastavacca biełaruskamoŭnym čałaviekam».
Kožny, chto pracuje tut, adznačaje, što, dziakujučy tamu, što tut sabralisia nie prosta tyja, kaho abjadnoŭvajuć prafiesijnyja skiły, ale i ludzi z padobnym śvietapohladam, ahulnymi kaštoŭnaściami, u kalektyva jość dadatkovy składnik, jaki jaho jadnaje. I heta robić kampaniju u razy macniejšaj.
Cikava, što siudy prychodziać i tyja, chto na movie raniej nie razmaŭlaŭ. Mienavita ŭ kampanii jany da hetaha prychodziać, padciahvajučy moŭnuju praktyku, adkryvajučy dla siabie novuju ajčynnuju muzyku, niezaležnyja srodki masavaj infarmacyi i hetak dalej.
U budučyni «Terasoft» źbirajecca tolki pašyracca. Naprykład, užo zaraz tut źjavilisia niekalki novych vakansij. Tak što, vidavočna, što ekśpierymient atrymaŭsia.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
