«Baluča za niedalnabačnuju palityku ŭ dačynieńni da biznesu». Jak Ivan Michnievič vyjšaŭ z Wargaming

Wargaming, raspracoŭščyk šmatkarystalnickich internet-hulniaŭ, samaja papularnaja ź jakich World of Tanks, ličyć za lepšaje zastavacca ŭ cieni i nie raskryvać svaju finansavuju spravazdačnaść, za vyklučeńniem hadoŭ, kali kampanija mieła listynh na kiprskaj biržy. Z tych časoŭ situacyja ŭ kampanii prykmietna źmianiłasia, jak i skład udzielnikaŭ. U pryvatnaści, jak raspaviali TUT.BY niekalki krynic, suzasnavalnik Wargaming Ivan Michnievič, jaki ŭznačalvaŭ hałoŭny centr raspracovak chołdynhu ŭ Minsku, bolš za dva hady tamu ŭdała pradaŭ dolu ŭ kampanii i zaniaŭsia raźvićciom ułasnych prajektaŭ.

Pavialičyć

Vyjści svoječasova

Zhodna z adzinaj publičnaj spravazdačnaściu Wargaming, jakaja była raskrytaja padčas listynha na kiprskaj biržy, Ivanu Michnieviču (№ 10 u top-200 samych upłyvovych biełaruskich biznesmienaŭ pa viersii «Ježiednievnika») pa dadzienych na krasavik 2013 hoda naležała 17% kampanii. Taki ž pakiet mieŭ Mikałaj Kacałapaŭ. Dola Viktara Kisłaha składała 38,5%, jaho baćki Uładzimira — 25,5%. Praz 2 hady akcyjanierami hałoŭnaj kampanii Wargaming LLP, zarehistravanaj u Anhlii, byli Kloyster Systems, Lunarbell Management, Ockster Financial, Sandrix Business, vynikaje z brytanskaj spravazdačnaści. Supastaŭlajučy dva dakumienty, možna zrabić vysnovu, što doli afšora na Brytanskich Virhinskich vyspach praktyčna supadajuć z dolami asnoŭnych akcyjanieraŭ.

Zhodna z hadavoj spravazdačaj, u kancy 2014 hoda brytanskaja Wargaming.Net LLP vykupiła Sandrix Business za 152,5 młn dalaraŭ. Sandrix naležała 20% najbujniejšaha raspracoŭščyka anłajn-hulniaŭ. Paśla zakryćcia ździełki dola inšych udzielnikaŭ (baćka i syn Kisłyja i Mikałaj Kacałapaŭ) była pavialičana praparcyjna.

«Nakolki ja mahu mierkavać, Ivan vielmi ŭdała vyjšaŭ. Vyjšaŭ da kryzisu, kali Wargaming byŭ na finansavym piku», — skazaŭ TUT.BY znajomy Michnieviča. Pavodle jaho słoŭ, spryjaŭ vychadu i hieapalityčny kanflikt pamiž Rasijaj i Ukrainaj 2014 hoda.

Na staroncy Michnieviča ŭ Linkedln taksama paviedamlajecca ab spynieńni jaho dziejnaści ŭ Wargaming ŭ kancy 2014 hoda.

«Maje adnosiny z Wargaming istotna adroźnivajucca ad raniejšych. Infarmacyja [ab prodažy doli za 152 młn dalaraŭ], jakaja ahučvałasia, u tym liku i vami, nie adlustroŭvaje rečaisnaść peŭnym čynam. Sapraŭdnaje stanovišča rečaŭ źjaŭlajecca kanfidencyjalnaj infarmacyjaj. Źmiena maich stasunkaŭ z Wargaming abumoŭlena pierš za ŭsio źmianieńniem piersanalnych uzajemaadnosin z partniorami, što taksama nie padlahaje publičnamu abmierkavańniu. Pierśpiektyvy ŭ Wargaming, biezumoŭna, jość, choć palityčnyja padziei 2014 hoda niesumnienna ŭdaryli pa ekanomicy jak mnohich dziaržaŭ, tak i kampanij, u tym liku i Wargaming. I taki ŭpłyŭ mnie byŭ zrazumieły zahadzia i ŭ bolšaj stupieni, čym maim partnioram», — napisaŭ TUT.BY Ivan Michnievič u adkaz na zapyt ab vychadzie z Wargaming.

U Wargaming nie ŭdałosia atrymać kamientar adnosna vychadu Michnieviča ź liku ŭładalnikaŭ kampanii.

Paśla tankaŭ 

Z 2014 hoda biznesmien źjaŭlajecca saŭładalnikam abo partnioram u šerahu prajektaŭ, častka ź jakich nie źviazana naŭprost z IT. Kiprskaja Synergy Horizon naładžvaje ŭ Biełarusi vytvorčaść sarbientaŭ dla likvidacyi ŭciečak naftapraduktaŭ. Šviejcarskaja kampanija Alpein Software zajmajecca raspracoŭkaj servisaŭ dla biaśpiečnych karparatyŭnych kantaktaŭ. Taksama Michnievič źjaŭlajecca partnioram u inviestycyjnym fondzie SCSS Fund Management.

«SinierdžyKom» razharnuła dziejnaść u Biełarusi ŭ 2011 hodzie z arhanizacyi hłybokaj pierapracoŭki hidroliznaha lihninu. U vioscy Pryharadnaja (Rečycki rajon, Homielskaja vobłaść) była stvorana vytvorčaja placoŭka pobač z syravinnymi zapasami. Da pačatku 2013 hoda była ŭkaraniona pieršaja rabočaja technałohija, i na jaje asnovie zapuščana dośledna-pramysłovaja vytvorčaść. U chodzie raboty z dapamohaj profilnych navukova-daśledčych instytutaŭ i kanstruktarskich biuro była raspracavana novaja technałohija. Dva hady zaniaŭ šlach ad pačatkovych idej, łabaratornych ekśpierymientaŭ i maštabnych madelaŭ da zapusku pieršaj paŭnavartasnaj vytvorčaj linii. Finansavańnie było ažyćcioŭlena za košt inviestycyjnaha kapitału z Kipra.

Pavialičyć

U 2013 hodzie dla biznesu była abranaja novaja hłabalnaja nazva Synergy Horizon, dla čaho na Kipry była inkarparavana hałaŭnaja kampanija Synergy Horizon Limited. Klučavymi rynkami zbytu źjaŭlajucca najbližejšyja bujnyja naftazdabyvajučyja rehijony — Rasijskaja Fiederacyja i krainy Blizkaha Uschodu, havorycca na sajcie kampanii.

Kamiercyjny ofis «SinierdžyKom» znachodzicca ŭ Minsku na vuł. Rumiancava, 7. Pa hetym adrasie ŭ samym centry horada (pł. Pieramohi) raźmieščany novy 10-kvaterny elitny dom.

U kancy 2016 hoda Ivan Michnievič abviaściŭ na svajoj staroncy ŭ Facebook ab zapusku šviejcarskaj Alpein Software šerahu novych servisaŭ, siarod jakich mieniedžar parolaŭ biaśpieki PassSecurium, virtualny pracoŭny stoł DeskSecurium i karparatyŭnaja płatforma biaśpiečnaj karparatyŭnaj suviazi SwissSecurium. Pa słovach biznesmiena, novyja servisy zarehistravanyja ŭ Šviejcaryi i znachodziacca ŭ byłym vajennym bunkiery «hłyboka ŭ šviejcarskich Alpach». Nad bunkieram raźmiaščajecca ad 300 da 1000 mietraŭ hranitu, zbudavańnie zdolna vytrymać udarnuju chvalu i elektramahnitny impuls ad atamnaj bomby mahutnaściu ŭ 20 miehaton. Data-centr zabiaśpiečvajecca hidraelektryčnaj enierhijaj i astudžajecca z dapamohaj raźmieščanych pad haroj vodnych reziervuaraŭ, schavanych u miljonach ton hranitu.

«Ja sapraŭdy maju dačynieńnie da pakazanych pryvatnych kampanij, adnak skład udzielnikaŭ, pamiery inviestycyj i vyniki haspadarčaj dziejnaści źjaŭlajucca kanfidencyjnaj infarmacyjaj», — skazaŭ Michnievič. Jon paćvierdziŭ, što «SinierdžyKom» — heta jaho «adziny biznes-aktyŭ u Biełarusi». «Prajekt vielmi składany i ambicyjny ŭ siłu stvareńnia pryncypova novych i całkam nie virtualnych praduktaŭ z unikalnym fizika-chimičnym składam i technałohijaj vytvorčaści. Rašeńni dla budaŭničaj i naftahazavaj haliny ŭ ciapierašni čas znachodziacca ŭ stadyjach siertyfikacyi i pačatku prymianieńnia», — adznačyŭ jon.

Dla Ivana Michnieviča Biełaruś «ciapier, i na najbližejšuju, kali nie siarednieterminovuju, pierśpiektyvu» źjaŭlajecca «zakrytaj krainaj pa pryčynach faktyčnaj niedalnabačnaj palityki, jakaja pravodzicca ŭ dačynieńni da biznesu». «Mnie baluča bačyć admoŭnuju sielekcyju, što pravodzicca na majoj radzimie», — reziumavaŭ jon.

• 0
• 0
• 0
• 0
• 0
• 0
• 0
• 0