Pozna ŭviečary ŭ piatnicu pasažyry minskaha tramvaja rezka adčuli siabie drenna. Akazałasia, u chłopca ŭ formie razhiermietyzavaŭsia hazavy bałončyk.
— Ja jašče dobra zapomniŭ čas, kali ŭsio zdaryłasia. Na hadzińniku było 23.15, — raspaviadaje Tut.by vidavočca zdareńnia Juryj, jaki jechaŭ u bok Sierabranki. — Na prypynku «Kazłova» ŭ tramvaj zajšli 8—10 junych milicyjantaŭ. Tolki my dajechali da čyhunačnaha mosta, jak usie pasažyry, a ich było čałaviek 15—20, stali čchać, kašlać. Pačałasia panika. Dzieci pierapałochalisia, raspłakalisia, uśled za imi ŭ mam pačałasia panika. Ja adkryŭ fortku, a pasažyry stali kryčać kiroŭcu, kab adčyniła dźviery, ale jana nie reahavała. Napeŭna, dumała, što raz u vahonie stolki milicyjantaŭ, to jany jak-niebudź raźbiarucca. Tyja taksama čchali, ale nijak nie reahavali. Jany byli razhublenyja i nie zmahli tałkova arhanizavać evakuacyju.
Tramvaj prajechaŭ jašče mietraŭ 200, zatym Juryj naciahnuŭ majku na tvar i pačaŭ prabiracca da kiroŭcy. Pasažyry pačali kryčać, bić pa škle, i tolki tady tramvaj spyniŭsia, dźviery adčynilisia.
— Žančyny byli vielmi złyja, u sałonie jechali zusim małyja - maksimum starejšym dzieciam 10 hadoŭ. Jany stali patrabavać u supracoŭnikaŭ pradstavicca. Vyśvietliłasia, jany vajskoŭcy, u adnaho ź ich razhiermietyzavaŭsia hazavy bałončyk, i jon pačaŭ apraŭdvacca, što haz «Šok» — heta niebiaśpiečna. Mahu skazać pa sabie: jašče da pałovy na druhuju nočy adčuvaŭ pierac u nosie. Uvohule, kiroŭca tramvaja začyniła dźviery i źjechała, a pasažyry zastalisia na darozie, — kaža vidavočca Jury.
— Upieršyniu pra heta čuju, — kamientuje Tut.by dyśpietčar tramvajnaha parku. — U mianie ničoha nie zafiksavana. A tramvaj stajaŭ? Nie? Nu tady čaho chočuć pasažyry?
U dziažurnaj častcy HUUS Minharvykankama heta PP taksama nie zafiksavana. Mahčyma, u piatnicu ŭviečary ŭ tramvai jechali vajskoŭcy ŭ formie milicyi.
— Nijakaj infarmacyi pa linii dziažurnaj častcy ŭ nas niama. Tamu paćvierdzić abo abvierhnuć hetuju infarmacyju ja nie mahu, — prakamientavaŭ Uładzimir Parchomcaŭ, načalnik pres-słužby Unutranych vojskaŭ MUS.
