Na dvuch aryštavanych aŭtaraŭ rasijskaha ahienctva «Rehnum» — Juryja Paŭłaŭca i Siarhieja Šypcienki — zaviali novyja kryminalnyja spravy pa artykule ab niezakonnaj pradprymalnickaj dziejnaści. Hetuju infarmacyju paviedamiŭ sa spasyłkaj na svaje krynicy BiełaPAN, i ŭ dačynieńni da svajho muža paćvierdziła TUT.BY Luboŭ Paŭłaviec.
Juryj Paŭłaviec
Novaja sprava pa č. 1 artykuła 233 KK (da 3 hadoŭ pazbaŭleńnia voli) zaviedziena jašče 6 maja. Luboŭ Paŭłaviec nie viedaje, u čym kankretna padazrajuć jaje muža pa hetym artykule.
Taksama ŭ dačynieńni da ŭsich troch aryštavanych aŭtaraŭ «Rehnum» (dvoje zhadanych plus Dźmitryj Alimkin) praciahvajecca sprava ab raspalvańni nacyjanalnaj varožaści za ich teksty na sajtach rasijskaha ahienctva i jašče niekalkich anłajn-ŚMI.
Pa słovach žonki Paŭłaŭca, śledčy zapeŭniŭ jaje, što da kanca červienia buduć hatovyja vyniki ekśpiertyzy tekstaŭ.
Pavodle jaje danych, śledstva pa spravie jaje muža padoŭžana da 28 žniŭnia. Luboŭ Paŭłaviec taksama paviedamlaje pra šerah pracesualnych parušeńniaŭ. Pavodle jaje słoŭ, SK užo dva miesiacy nie reahuje i nie vydaje advakatu jaje muža vypisanuju Paŭłaŭcom davieranaść na pradstaŭleńnie jaho intaresaŭ u sudach da Mininfarma i haziecie «SB Biełaruś siehodnia» ab abaronie honaru i hodnaści.
- Paśla 3 miesiacaŭ pierapiski z SK prakuratura horada Minska pradpisała addać davieranaść advakatu. Užo prajšło praktyčna dva miesiacy, davieranaść tak i nie addali.
Atrymać kamientar u Śledčym kamitecie pakul nie ŭdałosia.
