U Bransku (RF) Śledčy kamitet raspačaŭ kryminalnuju spravu ab chałatnaści z-za śmierci 11 novanarodžanych dziaciej u pierynatalnym centry Branskaj haradskoj balnicy № 1, paviedamlaje Meduza.
«U ramkach kryminalnaj spravy z pryciahnieńniem adpaviednych śpiecyjalistaŭ buduć vyśvietlenyja pytańni jakaści akazanych ustanovaj miedycynskich pasłuh», — skazana ŭ paviedamleńni.
Pierynatalny centr byŭ adkryty ŭ pačatku sakavika 2017 hoda, na adkryćcio pryjazdžaŭ prezident RF Uładzimir Pucin. 11 dziaciej, pavodle danych SK, pamierli ŭ pieryjad z 8 sakavika pa 1 červienia.
Ab praviercy pracy centra stała viadoma 21 červienia — paviedamlałasia, što jana była źviazanaja sa zvarotami žančyn, u jakich u radzilnym domie pamierli dzieci (videa sa zvarotam niekalkich žančyn było apublikavanaje 16 červienia).
Za niekalki dzion da hetaha vydańnie «Branskaja vulica» paviedamiła sa spasyłkaj na krynicy, što centr časova zakryty — nibyta z-za hibieli dziaciej ad unutrybalničnaj infiekcyi. Kiraŭnik centra Alaksandr Kułačenka abvierh hetyja zdahadki, zajaviŭšy, što centr zakryty na prafiłaktyčnyja pracy pa praviercy vientylacyi i kanalizacyi; pa jaho słovach, pamierłyja dzieci byli abo «z ekstremalna nizkaj masaj cieła», abo «mieli svaje zachvorvańni i ŭ jakich jašče było niedastatkova imunnaj sistemy».
21 červienia abłasny departamient achovy zdaroŭja paviedamiŭ, što pamierłyja dzieci znachodzilisia ŭ adździaleńni reanimacyi i intensiŭnaj terapii, kudy za čas pracy centra trapili 43 dziciaci (usiaho tam naradziłasia 705 čałaviek).
«Dziakujučy vykarystańniu sučasnych pierynatalnych technałohij zachavany žyćci 32 dzieciam, u tym liku 16 ź nizkaj i ekstremalna nizkaj masaj cieła», — zajavili ŭ departamiencie.