Hamialčanin rassyłaŭ na rasijskija pradpryjemstvy listy z paviedamleńniami ab vybuchovych pryładach, paviedamili BIEŁTA va ŭpraŭleńni Śledčaha kamiteta pa Homielskaj vobłaści.
Pryčynaj takich pavodzin stała kryŭda mužčyny na rehijanalnaha mieniedžara, jakaja admoviła jamu ŭ pracaŭładkavańni. «Elektronnyja listy, u jakich paviedamlałasia, što na ich terytoryi znachodziacca vybuchovyja pryłady, byli nakiravanyja ŭ adras dvuch rasijskich pradpryjemstvaŭ: Kiryšskaha naftapierapracoŭčaha zavoda Leninhradskaj vobłaści i Novasibirskaha mietałurhičnaha zavoda. Razam ź infarmacyjaj ab vybuchovych pryładach mužčyna pakidaŭ elektronny adras rehijanalnaha mieniedžara, na jakuju zataiŭ kryŭdu», — raspaviali ŭ USK pa Homielskaj vobłaści.
Supracoŭniki pravaachoŭnych orhanaŭ Rasii vyśvietlili, ź jakoha adrasu prychodzili listy. Ich biełaruskija kalehi vyśvietlili, što adpraŭnikom apynuŭsia hamialčanin, jaki znachodzicca na ŭliku ŭ psichijatryčnym dyspansiery.
U dačynieńni da mužčyny raspačata kryminalnaja sprava pa art.340 (zaviedama iłžyvaje paviedamleńnie ab niebiaśpiecy) KK RB. Zhodna z zaklučeńniem sudova-psichijatryčnaj ekśpiertyzy hamialčanin pryznany nieadekvatnym. Sprava pieradadzienaja ŭ prakuraturu.
Viadoma, što ŭ 2004 hodzie da mužčyny ŭžyvalisia miery prymusovaha lačeńnia ŭ psichijatryčnym špitali z ŭzmocnienym režymam nazirańnia. Tady jon taksama «miniravaŭ» roznyja pradpryjemstvy i ŭstanovy.
