Milicyja likvidavała bujnuju sietku raspaŭsiudu narkatyčnych rečyvaŭ. Taksama spynieny kanał pastaŭki narkotykaŭ — jany išli z Rasii.
Arhanizoŭvali raspaŭsiudžvańnie i zabiaśpiečvali drobnych handlaroŭ zabaronienych tavaram student i vykładčyca adnaho z VNU. Sietka pa raspaŭsiudžvańniu narkotykaŭ i psichatropaŭ była aryjentavana na staličnych spažyŭcoŭ, choć schovanki, u jakich raskładvalisia dozy, u asnoŭnym abstaloŭvalisia na terytoryi Minskaha rajona, paviedamlajuć milicyjanty.
Tut i nižej fota: uvd-mo.gov.by
Zatrymali studenta z vykładčycaj uviečary 19 červienia ŭ lasnym masivie niepadalok ad vioski Vałoŭščyna Minskaha rajona. Chłopcu — 20 hadoŭ, žančynie — 32.
Pavodle najaŭnaj u apieratyŭnikaŭ infarmacyi, mienavita hetaja para ŭdzielničała ŭ arhanizacyi raspaŭsiudu narkotykaŭ i psichatropaŭ. Da momantu zatrymańnia maładyja ludzi ŭžo paśpieli abstalavać niekalki śpiecyjalnych tajnikoŭ ź psichatropnymi rečyvami, pryznačanymi dla bolš drobnych handlaroŭ. U chodzie kanfiskacyi schovanak, asabistaha dahladu, a taksama pieratrusu na zdymnaj kvatery pary było znojdziena i kanfiskavana: 1002 h asabliva niebiaśpiečnaha psichatropu «alfa-PVP», 812 h amfietaminu, 496 h hašyšu i 156 h marychuany.
Na praciahu nastupnych dziesiaci dzion prajšła maštabnaja apieracyja pa likvidacyi dziejnaj sietki raspaŭsiudu narkotykaŭ. Zatrymanyja 13 čałaviek.
Usie jany pražyvali albo na terytoryi horada Minska, albo Minskaha rajona, usie — dastatkova maładyja ludzi: ad 20 da 33 hadoŭ. U ich zadaču ŭvachodziła atrymańnie drobnaaptovych partyj tavaru, raźmierkavańnie jaho pa dozach i abstalavańnie schovanak dla spažyŭcoŭ. Hrupa raźmiaščała schovanki hałoŭnym čynam u lasnych masivach Minskaha rajona.
Pry hetym znosiny z spažyŭcami adbyvałasia vyklučna ŭ virtualnaj prastory. Siarod klijentaŭ sietki pa raspaŭsiudzie ziella byli ŭ asnoŭnym žychary horada Minska.
Charakterna, što adzin z raspaŭsiudžvalnikaŭ - 28-hadovy minčuk — pierasoŭvaŭsia na aŭtamašynie, jakaja zachavała atrybutyku karety chutkaj dapamohi. Jon «śpiecyjalizavaŭsia» na hašyšy.
Pavodle infarmacyi milicyi, złačynnaja hrupa sfarmavałasia ŭ pačatku hoda, jaje dziejnaść u mai-červieni vyjšła na pik svajoj aktyŭnaści.
U ciapierašni čas u dačynieńni da ŭsich zatrymanych raspačatyja kryminalnyja spravy. Im pahražaje da 15 hadoŭ pazbaŭleńnia voli.