Kalekcyja rukapisnych natatak pieršaha lidara kamunistyčnaha Kitaja Mao Czeduna była pradadzienaja na aŭkcyjonie za canu, jakaja ŭ dziesiać razoŭ pieravysiła pačatkovuju, piša VVS.
Getty
Jany byli napisanyja ŭ 1975 hodzie i adrasavanyja prafiesaru, jaki byŭ naniaty dla taho, kab čytać Mao ŭsłych. Na aŭkcyjonie Sotheby's u Łondanie rukapisy pajšli za 704 750 funtaŭ sterlinhaŭ (kala 910 tysiač dalaraŭ ZŠA).
Pradstaŭniki aŭkcyjonnaha doma paviedamili, što heta niejmavierna redki dakumient. U ich vykładzienyja dumki Vialikaha kiraŭnika ab kitajskaj kłasičnaj litaratury i paezii, jakija Mao vielmi lubiŭ.
Jon napisaŭ ich za hod da śmierci, kali jaho zdaroŭje prykmietna pahoršyłasia. Jaho vočy stali kiepska bačyć, i čytać samastojna jon užo amal nie moh. Tamu jon zahadaŭ, kab da jaho zaprasili śpiecyjalista pa kłasičnaj litaratury dla čytańnia ŭsłych.
Takim śpiecyjalistam stała žančyna na imia Dzi Lu. Ale pakolki ŭ apošni hod žyćcia Mao Czedunu było ŭžo ciažka razmaŭlać, Dzi Lu prapanavała jamu zapisvać svaje dumki, kab ablehčyć znosiny.
Natatki, pradadzienyja na aŭkcyjonie, pa słovach supracoŭnikaŭ Sotheby ' s, dazvalajuć akunucca ŭ litaraturaznaŭčy śviet Mao Czeduna.
Rukapisnyja natatki Mao Czeduna. Fota Sotheby's
Mao Czedun uznačaliŭ Kamunistyčnuju partyju Kitaja ŭ 1949 hodzie. Paśla pieramohi nad Hamińdanam pad jaho kiraŭnictvam była stvorana Kitajskaja Narodnaja Respublika.
U maładości Mao pracavaŭ u biblijatecy Piekinskaha univiersiteta. Luboŭ da kłasičnaj litaratury Mao zachavaŭ, niahledziačy na radykalnyja revalucyjnyja pohlady.
Sotheby's nie nazvaŭ imia pakupnika, ale paviedamiŭ, što cikavaść da rukapisnych natatak Mao była vielmi vialikaj.
Natatki, pa słovach śpiecyjalista aŭkcyjonnaha doma pa knihach i manuskryptach Habryela Chitana, «adkryvajuć nam unutrany śviet Mao, pakazvajuć, što intaresy pravadyra vychodzili za ramki palityki, i paćviardžajuć jaho hłybokija viedy kłasičnaj kitajskaj litaratury».
Na pytańnie, čamu jany byli nabytyja za takuju vysokuju canu, Chitan skazaŭ, što z-za redkaści padobnych rukapisaŭ dać im chocb jakuju dakładnuju acenku da prodažu vielmi ciažka.
Cikavaść da Mao Czeduna zaŭsiody była vialikaj, asabliva ŭ Azii i Kitai.
Raniej u hetym hodzie napisany na šoŭku partret Mao byŭ pradadzieny ŭ Hankonhu za 11 miljonaŭ dalaraŭ.
