Navat kali tak zvany cukierkava-bukietny pieryjad skončyŭsia, nie budzie lišnim dadać u ramantyčnyja adnosiny krychu novych inhredyjentaŭ: kab čarhovy raz zapalić toj samy ahoń dvuch sercaŭ, jak zaviaščaŭ dziadźka Morysan. Łamać hałavu nie daviadziecca — my ŭžo padrychtavali dla vas śpis idej, jakija spracujuć stapracentna, bolš aryhinalnych, čym prosta kino, park ci vystava. Usie jany vyprabavany na sabie. I nie kažycie potym, što niama kudy zvadzić pana/panienku.
Padsiłkavacca nacyjanalnymi stravami
Ź miłym, kaniečnie, raj i ŭ šałašy, i ŭ makdaku, ale, kali chočacca niečaha asablivaha, nie skupiciesia na ramantyčnuju viačeru ŭ bolš samavitym miescy. Tak, restaran biełaruska-lićvinskaj kuchni «Kuchmistr», nibyta mašyna času, pieraniasie za bahatyja stały zamožnaj biełaruskaj šlachty XIX stahodździa. Pačnicie sa słavianskaha anałaha mieksikanskich burytas, zapicie ŭsio mocnym kvasam, a na desiert abaviazkova pasprabujcie «Sakret Marysieńki», jaki na mnohich zakachanych dziejničaje jak luboŭnaje zielle.
Historyja hetaha desiertu naradziłasia razam z ramantyčnymi adnosinami Maryi Kazimiry Łuizy de la Hranž d'Arkjen i karala Jana Sabieskaha. Mienavita «Marysieńka» zaviezła ŭ našy miaściny modu na apielsiny: u pierapiscy z karalom «Jasiem» jana časta pryhadvała sałodkija les oranges, namiakajučy na ich uzvyšanyja stasunki. Kali vy taksama chočacie dadać słodyčy ŭ l'amour, abaviazkova pasprabujcie hetuju sakretnuju stravu ź piečanaj ihrušy ŭ apielsinavym likiory z marozivam.
Darečy, uładalniki restarana vielmi prychilna staviacca da biełaruskamoŭnych naviedvalnikaŭ.
Tamu kožny, chto budzie razmaŭlać ź piersanałam pa-biełarusku, maje prava na źnižku 10%. Dadatkovy bonus praduhledžany dla čytačoŭ «Našaj Nivy»: pramaŭlajučy «Sakret Marysieńki» ŭ jakaści kodavaha słova, vy zmožacie atrymać adzin ź firmovych desiertaŭ biaspłatna. Viadoma, kali pryjdziecie ŭdvaich i budziecie vyhladać zakachanymi.
Kudy jechać: vuł. K. Marksa, 40;
Siaredni rachunak: 30—45 rubloŭ.
Razam namoknuć
Sapraŭdnaha, vialikaha mora ŭ Biełarusi jak nie było, tak i nie budzie, ale basiejnaŭ chapaje — i heta ŭžo niabłaha. Kali vy nie z tych, chto baicca sapsavać pryčosku ci zakavyrysty makijaž, i addajacie pieravahu aktyŭna bavić volny čas, to zaprasić lubaha ŭ delfinaryj budzie słušnym rašeńniem. Pa-pieršaje, dakazana, što delfinaterapija palahčaje nastupstvy roznych stresaŭ, što ŭ haradskich umovach aktualna dla kožnaha biełarusa. Pa-druhoje, lepš adrazu ŭbačyć, jak vaš partnior stavicca da žyviołak, a jany da jaho: samazakachany ehaist vyličvajecca adrazu.
Kansiervatyŭnaje płavańnie ci ekstremalny dajvinh na miescy možna spałučyć ź lohkaj viačeraj.
Samyja ŭpeŭnienyja ŭ svaich adnosinach mienavita ŭ delfinaryi niaredka vyrašajucca zrabić druhoj pałavincy prapanovu. Navat kali dryžać kalenki i nie pavaročvajecca jazyk, za vas usio zrobiać delfiny: na sabie pryviazuć piarścionak i tabličku z pryznańniem.
Paśla takoj mimimišnaj sceny partnioru ničoha nie zastaniecca, jak pahadzicca.
Da viedama: ramantyčnaje načnoje šou, što startuje ŭ 21.00 (z žyvoj muzykaj, akrabatyčnymi i tancavalnymi numarami i, samo saboj, vystupami marskich artystaŭ), prachodzić u delfinaryi kožnuju subotu.
Kudy jechać: Taškienckaja, 40;
Ceny: Płavańnie — 100 rubloŭ, dajvinh — 170 rubloŭ, ramantyčnaje načnoje šou — usiaho 28 rubloŭ.
Vysadzicca na vostravie
Praciahvajučy vodnuju temu, nielha nie pryhadać jachty i ciepłachody, što pastajanna kursirujuć pa Minskim mory. Dumajem, kožny z vas, pračytaŭšy «Puncovyje vietrazi» Hryna ci nahladzieŭšysia «Pirataŭ Karybskaha mora», maryŭ prymieryć na siabie rolu kapitana. Padarycie takuju mahčymaść i sabie, i vašamu partnioru, tym bolš što vandroŭka pa mory źjaŭlajecca pastajannym punktam u śpisie rečaŭ, jakija psichołahi rajać zrabić usim ludziam da kanca žyćcia.
Isnuje niekalki varyjantaŭ: zrabić spatkańnie adukacyjnym, navučyŭšysia asnovam jachtynhu. Ci prosta rassłabicca i zakazać na borcie stolik z šampanskim i žyvoj muzykaj. Tak, minski kłub «Mierydyjan» prapanoŭvaje arandavać jak jachty, tak i ciepłachod. Śviežaje pavietra, smažanaja harodnina ci šašłyk, pryhožyja vyspy i krajavidy za bortam — prykryjcie vočy i ŭjavicie sabie hetuju karcinku. Spadabałasia? Tady nie hublajcie čas i arhanizoŭvajcie zabavu na dvaich.
Pry žadańni ciepłachod i jachtu možna ŭpryhožyć kvietkami, šarykami ci tym, na što chopić fantazii.
Dzie znachodzicca: Kačyna, Minskaje mora.
Ceny: u siarednim 100—150 rubloŭ za hadzinu arendy jachty ci ciepłachoda.
Pabłukać u haradskich «džunhlach»
Centralny bataničny sad byŭ zasnavany ŭ 1932 hodzie, ale da hetaha času navat nie ŭsie minčuki naviedali zialonyja džunhli ŭ miežach horada. Hładyjołusy, pivoni, bez, dziasiatki vidaŭ dreŭ — usio heta, kali zychodzić sa statystyki, u pieršuju čarhu spadabajecca dziaŭčynkam, ale vopyt dziadoŭ padkazvaje, što ŭ kožnym chłopčyku taksama śpić juny batanik, jaki z uzrostam pračniecca.
Darečy, naŭprost na ŭvachodzie ŭ sad pracuje krama z kvietkami, tak što nie treba niezaŭvažna ad achoŭnikaŭ vyryvać kalekcyjnyja raśliny, kab prezientavać bukiet-siurpryz.
Akramia fłory, u sadzie možna panazirać za papuhajami i rybami. Abaviazkova zrabicie sełfi na pryhožym moście, dzie zvyčajna pakidajuć siamiejnyja zamki maładyja: kali vy tolki ŭ pačatku adnosin, budzie cikava paŭtaryć fotazdymak užo ŭ jakaści muža i žonki. Tym bolš što Bataničny sad haścinna dazvalaje rehistravać na svajoj terytoryi viasielli. U vypadku drennaha nadvorja zaŭsiody možna pieramiaścicca ŭ aranžareju.
Kudy jechać: Surhanava, 2v.
Kolki rychtavać za ŭvachod: 6 rubloŭ z čałavieka ŭ zvyčajny dzień, 8 — dla žanicha i niaviesty ŭ miežach vyjaznoj rehistracyi. Dazvoł na fotasiesiju śviata abydziecca ŭ 20 rubloŭ.
Uchapić dozu adrenalinu
U čym hałoŭny plus adrenalinavaha ŭstresvańnia, dyk heta ŭ tym, što vy budziecie ŭzhadavać takuju padzieju jašče davoli praciahły čas. A dyjałoh u adnosinach — zakład ich pośpiechu.
Sychodziačy z taho, nakolki biasstrašnym źjaŭlajecca vaš partnior, možna abirać varyjanty: skačok z parašutam, karcinh, zorbinh (katańnie ŭnutry vielizarnych šaroŭ pa ziamli i na vadzie) ci pieršaja sumiesnaja vyłazka na snoŭbord.
Na krajni vypadak, možna pajści ŭ hryby ci jahady — biaspłatna i časam ekstremalna.
Akramia hetaha, raim choć raz naviedać jaki-niebudź adkryty dach. Kali nie viedajecie dastupnych pobač, to zhaniajcie na ahladnyja placoŭki Nacyjanalnaj biblijateki, haścinicy «Biełaruś», na vyšejšyja pavierchi chmaračosaŭ ci prosta kupicie kvitok na koła ahladu ŭ parku Horkaha.
Uziać kurs na Paryž
Skupoje na ciopłyja dni leta-2017 pry pieršaj ža mahčymaści hrech nie vykarystoŭvać dla viełaprahułak.
Bačyš soniejka — chapaj kachanaha ci kachanuju i płanuj maršrut. Niama svajho rovara? Nie biada! Jość šmat miescaŭ, dzie vielik možna ŭziać u arendu, i adrazu ž imčać na Minskaje mora, u kaśmičnuju viosku Jupiter ci ŭ ramantyčnuju — Paryž.
Tak, u sałonach viełaprakatu ŭ siarednim za 15 rubloŭ na sutki možna arendavać vialiki kruizier i pry žadańni pajechać na im udvaich. U salidnych sałonach u kamplekcie ź vielikam biaspłatna prapanoŭvajuć košyki, šlemy i lichtary, sumki dla telefona dy viełazamki. Z takim naboram spakojna ŭklučajcie ŭ maršrut prypynak na piknik (tolki nie zabudźciesia schapić z saboj pradukty ci butelečku vina).
Darečy, sovam kudy bolš vyhadna katacca nočču: na vyjezdy ŭ poźnija hadziny dziejničajuć źnižki. Akramia taho, krajavidy z zorkami zapomniacca abaim nadoŭha.
Prasunutym maładzionam padydzie alternatyŭny varyjant aktyŭnaści na śviežym pavietry: naprykład, hiraskutery. Trymajcie ŭ hałavie nastupny fakt: praces asvajeńnia techniki jazdy na im taktylna vielmi zbližaje.
Navučycca novamu
Zapišyciesia na majstar-kłas! Možna razam źlapić vazu ci niešta ekstraardynarnaje na hančarnym majsterstvie. Kali ŭsio projdzie jak u filmie «Pryvid», dzie Patryk Suejzi bieražliva dapamahaje svajoj kachanaj Demi Mur vyrabić vazu, muraški na skury i ŭspaminy pra hety dzień zabiaśpiečanyja.
U Minsku dy inšych haradach zaprašajuć vučycca žyvapisu, fłarystycy, malavańniu piaskom, dekupažu i praviłam zdarovaha charčavańnia z asnovami fitnesu. Taksama zaŭsiody možna zapisacca na testavyja zaniatki zamiežnaj movy ci tancavalnuju treniroŭku — dastupna i z karyściu.
Zrabicie adno adnamu masaž, uładkujcie sačeńnie za biełaruskaj zorkaj, jak paparacy, pahulajcie razam u vajnušku… Isnuje jašče vialikaja kolkaść varyjantaŭ adarvacca aryhinalna. Nie lanujciesia ŭ adnosinach — i vaša kachańnie dakładna pražyvie bolš za try hady.
