U adkaz na novyja sankcyi ZŠA Rasija moža vysłać z krainy 35 amierykanskich dypłamataŭ, a taksama aryštavać nieruchomaść pasolstva ZŠA, piša «Kommiersant» sa spasyłkaj na krynicy ŭ MZS RF.
Pavodle «Kommiersanta», miery ŭ adkaz Maskvy buduć uličvać i dypłamatyčny skandał kanca minułaha hoda, kali amierykanskija ŭłady vysłali z krainy 35 rasijskich dypłamataŭ i aryštavali dva abjekty dypułasnaści.
«Pakolki dakumient robić faktyčna niemahčymym viartańnie Rasii jaje dypłamatyčnaj nieruchomaści ŭ ZŠA, aryštavanaj jašče pry raniejšaj administracyi, ułady Rasii mohuć nakłaści aryšt na dačny kompleks amierykanskaj ambasady ŭ Srebranym Bary i ich składskija pamiaškańni», havorycca ŭ materyjale.
Taksama Rasija moža vysłać 35 amierykanskich dypłamataŭ. Akramia taho, rasijskija ŭłady abmiarkoŭvajuć «mahčymaść abmiežavać maksimalnuju kolkaść supracoŭnikaŭ amierykanskaj dypmisii ŭ Maskvie».
Jak raspavioŭ RIA Naviny namieśnik staršyni kamiteta Dziarždumy pa mižnarodnych adnosinach Alaksiej Čepa, simietryčny adkaz na pazbaŭleńnie rasijskaj dypułasnaści byŭ padrychtavany daŭno. Pavodle słoŭ parłamientaryja, miery ŭ adkaz stvorać maksimum niazručnaściaŭ znachodžańnia amierykanskich dypłamataŭ u Rasii.
Napiaredadni pałata pradstaŭnikoŭ Kanhresu ZŠA bolšaściu hałasoŭ uchvaliła zakonaprajekt pa sankcyjach suprać Rasii, Irana i KNDR. U bližejšy čas dakumient razhledzić sienat, paśla čaho jon pastupić na podpis prezidentu.
U vypadku zaćviardžeńnia novy pakiet sankcyj moža stać samym maštabnym ad pačatku 2014 hoda. Abmiežavańni ŭ asnoŭnym datyčacca enierhietyki.
