Stała viadoma, što ŭ Biełaruś płanuje zavitać aŭtaprabieh Nacionalno-osvoboditielnoho dvižienija (rasijskaha praŭładnaha «ultrapatryjatyčnaha» ruchu).
Svoj prabieh «nodaŭcy» pryśviačajuć Pucinu i «Navarosii». Akramia taho, vykazvajuć sum z nahody «paražeńnia SSSR u chałodnaj vajnie», pužajuć «majdanam» i miašajuć u adnu kuču Pucina, pravasłaŭje, «infarmacyjnuju vajnu z Zachadam» i hetak dalej.
Pakul što dakładna nie viadoma, ci zajedzie «ahitprabieh» u Biełaruś — arhanizatary paviedamili, što im «treba ŭrehulavać pytańni ź Minskaj jeparchijaj». U rasijskich haradach, jak praviła, «nodaŭcy» pravadzili sumiesnyja akcyi ź miascovymi śviatarami.
«Naša Niva» źviarnułasia pa kamientar da Minskaj jeparchii — što za pytańni źbirajucca rehulavać «nodaŭcy» i jak na heta adreahuje carkva?
Nam adkazaŭ śviatar Siarhiej Lepin, protaijerej, staršynia infarmacyjnaha adździeła BPC.
«My nie ličym siabie pieramožanymi, a taksama nie vitajem raspaŭsiudžvańnia ŭ našym hramadstvie fobij i paraženstva. My paźbiahajem tych, chto stavić pad sumnieŭ niezaležnaść našaj krainy i nie pryznaje nieparušnaści jaje miežaŭ.
Siarhiej Lepin
My zusim nie źbirajemsia brać udzieł u abmierkavańni norm Kanstytucyi Rasii — my ź biaskonca vialikaj dolaj empatyi sočym za ŭsim, što adbyvajecca ŭ Rasii, ale ličym, što rasijskaje śviatarstva vałodaje dastatkovaj stupieńniu svabody dla taho, kab zrabić svaju kampietentnuju vysnovu nakont luboha rasijskaha zakona.
Nijakaj turbulentnaści ŭ suviazi z zapłanavanymi vybarami rasijskaha prezidenta ŭ našaj krainie niama, jak byccam. Zrešty, ja nie palityk…
U lubym vypadku, nijakich zvarotaŭ na naš adras na hetuju temu nie było, dy i BPC nie ŭdzielničaje ŭ palityčnych akcyjach (tym bolš tych, što pravodziacca niezarehistravanymi zamiežnymi arhanizacyjami), — paviedamiŭ Siarhiej Lepin. — I ja nie dumaju, što darečna arhanizoŭvać ahitprabiehi pa Biełarusi z metaj infarmavańnia jaje nasielnictva ab vynikach dziejnaści rasijskaha prezidenta i nadzialeńnia jaho niejkimi «nadzvyčajnymi» paŭnamoctvami ŭ nas — na moj pohlad, heta bolš nahadvaje niejki palityčny trolinh. Arhanizatary, peŭna, zrobiać jašče vialikija ździŭlenyja vočy, kali im admoviać…
My vielmi daražym luboŭju i siabroŭstvam bratniaha rasijskaha naroda i asudžajem pravakacyi, što majuć za metu ŭbić klin pamiž našymi dziaržavami — ź jakoj by častki śvietu takija zachody nie rabilisia.
Usim žadaju miru ŭ Chryście».