U płanach — budaŭnictva supolna z rasijskaj kampanijaj «Rasatam» daśledčaha jadziernaha reaktaru i Centru jadziernych daśledavańniaŭ u «Sosnach» — za 7 km ad Minskaj kalcavoj darohi i za 5 km ad Šabanoŭ.
Pavodle ciapierašnich płanaŭ, treci reaktar (pieršyja dva — na BiełAES) miarkujuć zapuścić «u siaredzinie nastupnaha dziesiacihodździa». I kali pieršyja dva reaktary buduć «padtrymlivać ekanomiku», to treci budzie pracavać tolki ŭ navukovych metach.
Pra pytańni biaśpieki navukovaha reaktaru Kuźmin i inšyja čynoŭniki nie kazali — tolki pra biaśpieku reaktaraŭ BiełAES. Ministr enierhietyki Biełarusi Michaił Michadziuk ža zajaviŭ, što placoŭka pad BiełAES «siejśmična pasiŭnaja» (u 1990-ch kazali advarotnaje), što «zališkaŭ enierhii nie byvaje», a taksama što radyjeaktyŭnyja adkidy buduć zachoŭvacca na terytoryi BiełAES pieršyja 10 hod, pakul buduć «astyvać», a dzie dalej zachoŭvać adkidy — jašče nie vyrašyli.
Pra pabudovu ŭ «Sosnach» jadziernaha reaktaru kazali prynamsi apošnija piać hod. U «Sosnach» u saviecki čas dziejničaŭ daśledčy atamny reaktar IRT-1000 mahutnaściu da 4 MVt, u 1980-ja byli stvoranyja mabilnyja atamnyja elektrastancyi «Pamir», što raźmiaščalisia na kołavych ciahačach, mahli vypracoŭvać kala 1 MVt i nibyta mahli absłuhoŭvacca adnym sałdatam. Adna z ustanovak prajšła vyprabavańni, ale paśla katastrofy na Čarnobylskaj AES abiedźvie zbudavanyja ŭstanoŭki «Pamir» byli źniščanyja. Ad adnoj va ŭnutranym dvoryku instytutu pakinuli korpus reaktaru.
