Ciaham apošnich hadoŭ u Rasii vyjšła niamała knih, aryjentavanych na biełaruskaha čytača. Aŭtary — tak zvanyja «zachodnierusisty», jakija admaŭlajuć prava Biełarusi na niezaležnaść. Tam i Biendzin, i Kryštapovič, i aŭtar zabłakavanaha ŭ Biełarusi «Sputnika i pohroma» Aviarjanaŭ-Minski.
Raniej my padrabiazna pisali pra hetaje koła.
Čytajcie: Chto choča zrabić ź Biełarusi Zachodniuju Rasiju — daśje
Usie jany razam i paasobku štampavali tvory, dzie davodzili dumki pra «ahulnaruskuju darohu», jakaja tolki i moža pryvieści Biełaruś da roskvitu.
Voś i novyja try knihi rychtujucca da vychadu. Chto heta apłačvaje?
Jak vyśvietliła «Naša Niva», srodki na napisańnie rusafilskich knih, nacelenych na biełaruskuju aŭdytoryju, vydatkoŭvaje rasijskaja arhanizacyja CIS-EMO.
Heta svojeasablivaja arhanizacyja. CIS-EMO rasšyfroŭvajecca jak Commonwealth of the Independent States — Election Monitoring Organization. Jana była stvoranaja jak procivaha BDIPČ ABSIE i naziralnym misijam ABSIE.
CIS-EMO paśladoŭna pryznavała svabodnymi i spraviadlivymi vybary ŭ Rasii, Biełarusi, Kazachstanie, Tadžykistanie dy inšych krainach, dzie naziralniki ABSIE kanstatavali abo falsifikacyi, abo strach i adsutnaść kankurencyi.
Ale z časam arhanizacyja CIS-EMO vyjšła za miežy pieršapačatkovaj misii.
Jana vydaje zborniki typu «Parušeńni pravoŭ čałavieka ŭ Litvie», «Novaja Jeŭropa Uładzimira Pucina» (na vokładcy — Pucin ź Lo Pen), «Kryvavyja złačynstvy banderaŭskaj chunty».
Samu hetuju arhanizacyju stvaryli ŭ 2003 hodzie, na čale staŭ rasijski palittechnołah Alaksiej Kačatkoŭ, jaki pracavaŭ u Dziarždumie, adkazvaŭ za suviazi z krainami byłoha SSSR, ciapier uznačalvaje fond «Narodnaja dypłamatyja» i maje suviazi ŭ tym liku ź biełaruskim «Rumołam».
Rasijski dziaržaŭny sacyjalny ŭniviersitet u Minsku, 28 kastryčnika 2016. Rasijski fond «Narodnaja dypłamatyja» prezientuje studentam «viadomaha čarnahorskaha žurnalista». Pobač u akularach siadzić Siarhiej Łušč. Nahadajem, što ŭ Čarnahoryi niadaŭna była sarvanaja sproba dziaržaŭnaha pieravarotu, arhanizavanaja rasijskimi strukturami.
Čytajcie taksama: Ad nieanacyzmu i zmahańnia z «juda-chryścijanskaj akupacyjaj» da studyi Davydźki: śpiecmateryjał pra kiraŭnika «Rumoła» Siarhieja Łušča
Ad 2013 hodu CIS-EMO uznačalvaje Alaksandr Biadrycki, supracoŭnik Rasijskaha instytuta stratehičnych daśledavańniaŭ. Jon pazicyjanuje siabie jak znaŭca amierykana-rasijskich adnosin i śpiecyjalist pa infarmacyjnych vojnach.
Čytajcie taksama: Dyrektar Rasijskaha instytuta stratehičnych daśledavańniaŭ: Niezaležnaj Biełarusi być nie moža
Voś śpis niekatorych knih, vydadzienych CIS-EMO za čas jaho raboty:
K. Avieŕjanov-Minskij, V. Malciev. «Biełorusskij nacionalizm protiv Russkoho mira»
Ł. Krištapovič, A. Filippov. «BSSR i Zapadnaja Biełoruśsija: 1919-1939»
A. Biendin. «Michaił Muravjev-Vilenskij. Uśmiritiel i rieformator Sieviero-Zapadnoho kraja Rośsijskoj impierii».
N.N. Mališievskij. «Biełaja hvardija Biełoj Rusi» (Sierija «Słavnyje imiena Biełoj Rusi»).
Hordosť Sovietskoj Biełoruśsii. Kniha I. (Sierija «Słavnyje imiena Biełoj Rusi»).
Matieriały mieždunarodnoho kruhłoho stoła «Civilizacionnyje osnovy hosudarstviennosti Rośsii i Biełoruśsii»
A adkul srodki na heta? Arhanizacyja CIS-EMO atrymlivaje hrošy ź dziaržaŭnaha biudžetu Rasii: prezident štohod vydaje Rasparadžeńni, jakija majuć na mecie hrantavuju padtrymku «niekamiercyjnych niaŭradavych arhanizacyi, jakija ŭdzielničajuć u raźvićci instytutaŭ hramadzianskaj supolnaści, realizujuć sacyjalna značnyja prajekty ŭ śfiery abarony pravoŭ i svabod čałavieka».
Voś hetaje rasparadžeńnie za 2016 hod, naprykład, na sajcie prezidenta Rasii.
Hranty, u svaju čarhu, zvyčajna prachodziać praz Nacyjanalny dabračynny fond Rasii, abo praz Rasijski sajuz moładzi, u čyich «konkursach» «pieramahaje» CIS-EMO.
Kolki hrantaŭ ad prezidenta Rasii atrymali hetyja aŭtary na svaje knižki?
My znajšli niekatoruju infarmacyju.
Tak, u 2016 hodzie jany atrymali dva z pałovaj miljona rasijskich rubloŭ (kala $45 tysiač) na «raspracoŭku humanitarnaha padmurka rasijska-biełaruskaj intehracyi, supraćdziejańnie falsifikacyi historyi».
Što ŭklučaje prajekt? «Raspracoŭku i vydańnie tematyčnaj litaratury pa biełaruskaj historyi i supolnaj historyi Rasii i Biełarusi i jaje raspaŭsiud siarod ekśpiertnaj supolnaści, studenckaha i masavaha čytača».
Jak havorycca ŭ rašeńni ab vydzialeńni srodkaŭ, «prajekt naceleny na adnaŭleńnie ahulnaruskaj identyčnaści hramadzian Rasii i Biełarusi,
supraćdziejańnie falsifikacyi historyi šlacham aśviatleńnia minułaha Biełarusi biez nacyjanalistyčnych skažeńniaŭ i pieradziorhvańniaŭ. U vyniku ŭ hramadzian Biełarusi maje sfarmiravacca pazityŭny vobraz Rasii, što budzie spryjać ŭmacavańniu dvuchbakovych adnosinaŭ ŭ miežach Sajuznaj dziaržavy RF i RB».
Heta nie adziny hrant u tym hodzie, jaki atrymała zahadkavaja CIS-EMO, da jakoj prybilisia biełaruskija publicysty, tamu my nie možam skazać, kolki knih napisana kankretna za hetyja $ 45 tysiač.
Stolki ž hrošaj CIS-EMO, naprykład, atrymała na padrychtoŭku ekśpiertnaha dakłada «Stratehija ŭzajemadziejańnia z zamiežnymi NPA na postsavieckaj prastory». Tracina hetaha «ekśpiertnaha dakłada» pryśviečana Biełarusi, jakuju tam abvinavačvajuć u raspalvańni sieparatyzmu (!) na Smalenščynie i ŭ Kalininhradskaj vobłaści. Dakład vyjšaŭ u 2016 hodzie.
Na hety dakład taksama byli vydatkavanyja 2 500 000 rasijskich rubloŭ (kala $45 tysiač) prezidenckaha hrantu. Pryčym u hetym razie bačna, što hrošy bralisia «na Krym», a atrymaŭsia dakład pra Biełaruś i Kazachstan.
Ale vierniemsia da tych $ 45 tysiač za dakład. Takim čynam, ci nie cana heta za adnu knihu?
Hetyja knihi raspaŭsiudžvajucca zbolšaha zadarma, ale pradajucca i za hrošy — u asobnych pravasłaŭnych internet-kramach Biełarusi, kštałtu «Śviatła Favora».
Niekatoryja ŭniviersitety, naprykład, Mahiloŭski dziaržaŭny imia Kulašova, navat mieli letaś nieaściarožnaść pravieści ŭ svaich ścienach prezientacyju knihi «Nieśviadomaja historyja Biełaj Rusi». Jaje pravioŭ zachodnierusist Leŭ Kryštapovič.
U płanach CIS-EMO ciapier — vybić hrošy na vyvučeńnie «pierśpiektyŭ supracoŭnictva pryhraničnych vobłaściaŭ Rasijskaj Fiederacyi i Respubliki Biełaruś».
«Sajuznaja dziaržava Rasii i Biełarusi isnuje ŭžo 20 hadoŭ, ale intehracyjnyja pracesy iduć nie tak chutka, jak mierkavałasia spačatku. Adna z pryčyn hetaha, jak ujaŭlajecca, małaja raspracavanaść prablemy supracoŭnictva pryhraničnych vobłaściaŭ RF i RB», — pišuć aŭtary ŭ zajaŭcy na hrant.
Vyhladaje, što CIS-EMO z «manitorynhavaj arhanizacyi» pieratvaryłasia ŭ strukturu, paralelnaj zadačaj jakoj stała prasoŭvańnie idej «ruskaha śvietu» i finansavańnie asob, jakija adstojvajuć vyhadnyja dla Rasii idei. Pryčym kali ŭ krainach Jeŭrasajuza heta idei vychadu krain ź ES, to ŭ Biełarusi heta dumka pra niesamastojnaść biełarusaŭ jak nacyi i patrebie Biełarusi rasijskaha parasona.
