Hrybny siezon u samym razhary. Chtości samastojna vypraŭlajecca ŭ les za śviežymi baravikami i padbiarozavikami, a inšyja kuplajuć hryby ŭ handlaroŭ. Karespandent «Respubliki» zazirnuła na minski Kamaroŭski rynak i daviedałasia, jakuju pravierku prachodziać darunki lesu, pierš čym trapić na pryłavak.
Vysoki hrybny siezon pratrymajecca da taho času, pakul tempieratura nočču nie ŭpadzie nižej za 7—10 hradusaŭ.Ad bahataha vybaru hryboŭ na rynku vočy raźbiahajucca: tut i vaŭnianki, i padbiarozaviki, i čyrvonahałoviki, i lisički, i ryžyki. Ale bolš za ŭsio na pryłaŭkach baravikoŭ: hrybniki raskazvajuć pra ich niebyvały ŭradžaj sioleta. Taćciana Maisiejeva, navukovy supracoŭnik Instytuta lesu Akademii navuk, tłumačyć, što vosień zaraz ciopłaja i daždžlivaja — heta i stvaraje spryjalnyja ŭmovy dla rostu hryboŭ. Vysoki siezon pratrymajecca da taho času, pakul tempieratura nočču nie ŭpadzie nižej za 7—10 hradusaŭ.
— Nie žadajecie kupić viadzierca baravičkoŭ? Pahladzicie, jakija čyścieńkija! — źviartajecca da mianie pradaviec z Baranavickaha rajona. — Usiaho 9 rubloŭ.
Na kožnuju partyju hryboŭ tut jość tałončyk, jaki pakazvaje sapraŭdnuju čyściniu tavaru — najaŭnaść u ich radyjenuklidaŭ. Pakupnik na rynku moža zaŭsiody zapatrabavać vynik ekśpiertyzy.
— Dapuščalnaja norma dla hryboŭ — 370 Bk/kh, — kaža Valeryj Varabiej, namieśnik načalnika słužby arhanizacyi rynačnaha handlu Kamaroŭskaha rynku. — Voś u hetych baravičkach u 10 razoŭ mienš ceziju.
Zaraz čatyry hadziny dnia — žadajučych pravieryć pradukcyju ŭ łabaratoryi niama. Taćciana Baciuk, vykonvajučaja abaviazki zahadčycy łabaratoryi № 4, havoryć, što čerhi na daśledavańnie byvajuć tolki ranicaj:
— Dla ekśpiertyzy nieabchodna zdać kiłahram pradukcyi, pryčym hryby pavinny być pasartavanyja pa vidach, bo kožny nazapašvaje radyjacyju pa-roznamu. Za siońniašni dzień łabaranty pravieryli 54 partyi hryboŭ.
Dapuščalnaja norma radyjenuklidaŭ dla hryboŭ — 370 Bk/kh.
Urač-radyjołah Julija Abramčuk demanstruje nam praces. Pierš za ŭsio kiłahram hryboŭ zdrabniajecca i kładziecca ŭ jomistaść — jana pavinna być zapoŭnienaja maksimalna, inakš vymiareńnie nie daść dakładnych vynikaŭ. Dalej hryby adpraŭlajucca ŭ śpiecyjalny prybor. Čakać pryjšłosia kala dziesiaci chvilin — zatym na manitory źjaŭlajecca ličbavaje značeńnie ŭdzielnaj aktyŭnaści radyjenuklidaŭ ceziju-137. Baraviki pravierku prajšli: prybor pakazaŭ 30 Bk/kh.
Miž inšym, handlary abaviazany razam z probaj prynieści ŭsie hryby, jakija jany majuć namier pradavać. Kali vynik pieravyšaje normu, to pradukcyja ŭtylizujecca ŭ ich prysutnaści. Taćciana Baciuk zaŭvažaje:
— Siońnia 25 kiłahramaŭ baravikoŭ akazalisia nieprydatnymi dla prodažu.
Kali vyjšła z rynku, źviarnuła ŭvahu na niekalkich nielehalnych pradaŭcoŭ hryboŭ i jahad kala HC «Impuls». Tałona na čyściniu pradukcyi ŭ ich nie było. Stała cikava: nakolki adroźnivajecca košt pravieranych hryboŭ i tych, pra miesca zboru jakich možna tolki zdahadvacca.
— Viadzierca baravikoŭ addam za 8 rubloŭ! — hučyć prapanova adnaho z pradaŭcoŭ.
Na čyrvonahałoviki, ryžyki i inšyja vidy roźnica taksama nie pieravyšała adnaho rubla. Dyk ci varta ryzykavać zdaroŭjem z-za nieistotnaj ekanomii?
