Vučeńni «Zachad-2017» pakazali chaładok pamiž kiraŭnictvam Biełarusi i Rasii. Kiraŭniki dziaržaŭ nie zdoleli damovicca, chto da kaho jedzie. U Biełaruś nie prybyŭ nie toje što ministr abarony Rasii Siarhiej Šajhu, a navat jahonych namieśnikaŭ nie było. Uzrovień pradstaŭnictva Rasii tut — heta načalnik Zachodniaj vajskovaj akruhi RF Andrej Kartapołaŭ, jaki siadzieŭ pobač z Alaksandram Łukašenkam (!) i ministram abarony Biełarusi.
Što kazać, kali navat puł rasijskich žurnalistaŭ nie prybyŭ na zakryćcio vučeńniaŭ u Biełaruś, akcentavaŭšy ŭvahu na rasijskich palihonach.
Treba mierkavać, što heta reakcyja Maskvy na niedavier z boku biełaruskich uładaŭ, jakija ŭviali kvoty na kolkaść rasijskaha ŭzbrajeńnia na terytoryi Biełarusi ŭ čas vučeńniaŭ i ŭ pryncypie.
Što jašče vyjavili vučeńni? Jany, u pryvatnaści, ahalili niepadrychtavanaść Biełarusi da infarmacyjnych atak z boku Rasii, i nie tolki Rasii.
Uvohule, vakoł vučeńniaŭ było šmat šumu.
Polšča i Litva abvinavačvali Biełaruś u płanavańni ataki na Suvałski kalidor.
Ukraincy zakinuli fejk pra ŭdzieł u vučeńniach vojskaŭ «ŁNR-DNR».
Nieviadomyja pakłali sajt Minabarony (ci jon nastolki sučasny, što nie zdoleŭ apracavać pavyšanuju, nie budziem kazać vialikuju, kolkaść naviednikaŭ) i ŭzłamali tvitar Homielskaj milicyi.
FSB u Homieli, vyhladaje, vykrała junaha ŭkrainskaha internet-bajca Hryba ŭ ramkach infarmacyjnaj art-padrychtoŭki da vučeńniaŭ.
Rasijskija NODaŭcy prajechali z partretami Pucina pa biełaruskaj stalicy.
Ale samym haračym momantam było, kali rasijanie «paviali» na Biełaruś tankavuju dyviziju.
Jak my na heta adkazvali?
Kidajecca ŭ vočy zapoźnienaja infarmacyjnaja reakcyja našych viedamstvaŭ na mnohija z hetych padziej. Jany pramarudžvali dziasiatki hadzin, a časam i sutki, kali situacyja vymahała imhniennaj reakcyi.
My zapytalisia ŭ analitykaŭ tematyki biaśpieki Alaksandra Alesina i Andreja Parotnikava, što pra heta dumajuć jany.
«Historyja ź niepryjezdam Pucina, Šajhu — usio heta skiravana na toje, kab pakazać niesamastojnaść Minska i jaho zaležnaść ad Maskvy, — miarkuje Andrej Parotnikaŭ.
— Infarmacyjnyja ŭkidy z boku Rasii byli najpierš skiravanyja na zachodniuju aŭdytoryju, Biełaruśsiu hulali na hetym infarmacyjnym poli.
A što my? Hlańcie navat na rabotu z zamiežnymi žurnalistami. Davajcie spytajem Minabarony, kolki reparcioraŭ zachodnich ŚMI sa šmatmiljonnaj aŭdytoryjaj nie prylacieli ŭ Minsk, bo im adkazali za dzień da pačatku vučeńniaŭ? I kali vy kažacie pra vysnovy, to nijakich vysnovaŭ zroblena nie budzie. Ludzi, adkaznyja za infarmacyju, prosta nie zdolnyja ich zrabić.
Treba prosta zvolnić Huru [hałoŭny ideołah Minabarony] i Makarava [pres-sakratara], jakija siadziać tam ź viedami brežnieŭskaj epochi, nie prystasavanyja da sučasnych vyklikaŭ. Savieckija palitruki ŭ pryncypie nie mohuć uśviadomić, što jany robiać nie tak.
Uładzimir Makaraŭ, pres-sakratar Minabarony Biełarusi. Fota Siarhieja Hudzilina.
Uvohule, pryhadaju Makaravu jašče toje, što dva hady tamu jon źniaŭ z sajta Minabarony infarmacyju pra Davyda Haradzienskaha, Kaściušku i inšych, patłumačyŭšy heta praviadzieńniem techničnych rabot. I dahetul taja infarmacyja nie adnaviłasia. Jakija ŭ vas jašče pytańni da ideołahaŭ?
Dzie ŭziać tałkovych śpiecyjalistaŭ, kab ich zamianić? A nie viedaju. Tam nie tyja zarobki, kab prafiesijanały ź inšych śfier pajšli tudy słužyć», — adrezaŭ Parotnikaŭ.
Parotnikaŭ taksama miarkuje, što pryjezd NODa — heta dobra spłanavanaja pravakacyja, jakaja taksama sihnalizuje najpierš Zachadu, što Minsk nie moža kantralavać unutranuju situacyju.
«Jašče pytańnie, jak jany zajechali. Moža być, jany jechali da Minska jak zvyčajnyja mašyny, a ŭžo potym načapili ci adviesili ŭsie hetyja postary», — skazaŭ jon.
Alaksandr Alesin taksama miarkuje, što vučeńni vyjavili słabaść Biełarusi na infarmacyjnym poli.
«Ja znachodziŭsia z kanadskimi dypłamatami ŭ momant apublikavańnia rolika pra pierakidvańnie tankavaj dyviziii ŭ Biełaruś, — skazaŭ Alesin. — Mnie daviałosia terminova šukać tłumačeńni hetamu, interpretavać, kab supakoić ich. Faktyčna, kanadcy byli źbiantežanyja i amal u panicy.
Upeŭniena kažu, što jašče niekalki hadzin maŭčańnia i hetaja situacyja ź infarmacyjnaj mahła pieraŭtvarycca ŭ palityčnuju. Pryčyny infarmacyjnych atak jasnyja i ŭkładvajucca ŭ daktryny našych susiedziaŭ. Skažam, usie ataki na Polšču pačynalisia z terytoryi Biełarusi, jana nie moža dazvolić, kab my stali jašče raz takim płacdarmam. Rasija choča zrabić z nas svoj bastyjon. Ukraina… My znachodzimsia na hieapalityčnym razłomie, i ŭsie susiedzi buduć sprabavać na nas upłyvać infarmacyjna. Što da supraćdziejańnia… Vy słuchali, što kazaŭ Makaraŭ? U jahonych farmuloŭkach ciažka razabracca. Spažyŭcy infarmacyi siońnia — heta maładyja ludzi, jakija chutčej usprymajuć lohkuju formu, čym zakručanyja manałohi z papierki, tamu i viaducca na fejki. Biełarusi patrebny svaje infarmacyjnyja vojski, jakija isnujuć i ŭ Rasii. Skažam, Valeryj Hierasimaŭ, načalnik Hienštaba RF, jaki ličycca stvaralnikam mietadałohii hibrydnaj vajny, kaža, što infarmacyjnyja ataki pravodziacca ŭvieś čas, niezaležna ad fazy vajny. Na padrychtoŭčym etapie, u čas, paśla zaviaršeńnia… U nas niama miechanizmu adkazu na takija ataki, kali kazać pra dziaržaŭnyja orhany, ź jakoha boku b jany nie išli: z Uschodu ci Zachadu.
Možna skazać, što kreatyŭ prajaviŭ adzin Łukašenka, znajšoŭšy što skazać na niepryjezd Pucina. Ale ci moža być takoje, što na ŭsiu krainu adzin čałaviek, zdolny dać adkaz? Tut pytańnie ŭ adsutnaści razumieńnia, jak heta robicca, ci ŭ bojazi inicyjatyvy? Treba mianiać infarmacyjnuju sistemu, nabrać maładych kreatyŭnych chłopcaŭ, jakija buduć hodna adkazvać na vykliki», — miarkuje Alesin.
