UEFA zaćvierdziŭ rehłamient Lihi nacyj — novaha turniru dla zbornych, jaki pačniecca ŭ vieraśni 2018 hoda. Pieršy matč novaha turniru adbudziecca 6 vieraśnia 2018 hoda.
Liha nacyj — novy turnir, jaki zamienić bolšaść tavaryskich matčaŭ zbornych aficyjnymi i dazvolić im hulać z roŭnymi pa kłasie kamandami, kab zabiaśpiečyć roskvit futboła na ŭzroŭni zbornych.
Udzieł u turniry voźmuć usie 55 zbornych.
Kamandy raźmiarkujuć pa čatyroch lihach (A, B, C i D) u adpaviednaści ź ich rejtynham na kaniec jeŭrapiejskaj kvalifikacyi ČS-2018 (vyniki paśla 11 kastryčnika 2017 hoda ŭličvacca nie buduć, u tym liku vyniki stykavych matčaŭ).
U lizie A zhulajuć 12 top-zbornych. Nastupnyja 12 trapiać u lihu B, nastupnyja 15 - u lihu C, 16, što zastalisia — u lihu D.
Lihi A i B buduć składiucca z čatyroch hrup pa try kamandy. Liha C — z adnoj hrupy z tryma kamandami i troch hrup pa čatyry kamandy. Liha D — z čatyroch hrup pa čatyry kamandy.
Zbornaja Biełarusi, chutčej za ŭsio, trapić abo ŭ lihu C (zaraz u nas 36-je miesca), abo D (tam buduć kamandy z 40-ha miesca i nižej). Pracedura losavańnia nie zaćvierdžana. Matčy buduć pravodzicca doma i na vyjeździe ŭ vieraśni-listapadzie 2018 hoda (kožnaja zbornaja praviadzie čatyry ci šeść hulniaŭ u zaležnaści ad pamieru hrupy).
Pieramožcy čatyroch hrup lihi A vyjduć u finalnuju stadyju, jakaja projdzie ŭ červieni 2019 hoda. Jana budzie składacca z paŭfinałaŭ, matča za treciaje miesca i finału. Haspadaroŭ abiare Vykanaŭčy kamitet UEFA ŭ śniežni 2018 hoda ź liku ŭdzielnikaŭ.
Pieramožcy hrup lih B, C i D zarobiać pavyšeńnie ŭ kłasie. Horšyja kamandy ŭ hrupach lih A, V i S vyleciać u nižejšuju lihu.
Takim čynam, jeŭrapiejskija zbornyja buduć zmahacca albo za pieramohu ŭ Lizie nacyj, albo za vychad u dyvizijon vyšej, albo za zachavańnie miesca ŭ svaim dyvizijonie.
Losavańnie hrupavoha etapu Lihi nacyj projdzie 24 studzienia 2018 hoda.
Adboračny cykł JEŬRA-2020 nie źviedaje surjoznych źmien (vyznačacca ŭładalniki 24 puciovak). Ale pačniecca jon nie ŭ vieraśni, jak było raniej paśla finalnych stadyj bujnych turniraŭ, a sakaviku 2019 hoda.
Kamandy razabjuć na dziesiać hrup pa piać ci šeść zbornych. Dźvie lepšyja zbornyja kožnaj hrupy vyjduć u finalnuju stadyju. Tak vyznačacca ŭładalniki pieršych 20 puciovak.
Jašče čatyry ŭdzielniki JEŬRA-2020 vyznačacca ŭ stykavych turnirach z udziełam 16 pieramožcaŭ hrup Lihi nacyj UEFA (pieramožcaŭ usich čatyroch hrup va ŭsich čatyroch lihach).
U kožnaj lizie svoj płej-of budzie z dvuch adnamatčavych paŭfinałaŭ i finału. Pieramožcy kožnaha płej-of atrymlivajuć pucioŭki na JEŬRA-2020.
