Kniha składajecca z čatyroch hłavaŭ. U pieršaj detalova raskazvajecca pra historyju funkcyjanavańnia polskaj pamiežnaj achovy na miažy z BSSR u rajonie Minsk-Zasłaŭje. Akramia historyi pamiežnych punktaŭ i stražnic čytačy knihi daviedajucca šmat cikavaha pra toje, čym byŭ polski Korpus achovy pamiežža (KAP), chto ŭ im słužyŭ, jak vyhladaŭ zvyčajny dzień polskaha pamiežnika na miažy z «krainaj Savietaŭ».
Vialikaja ŭvaha nadadzienaja historyi baraćby z kantrabandystami, a taksama pracy polskaj pamiežnaj vyviedki. U druhoj hłavie publikujucca cikavyja i małaviadomyja fakty z historyi funkcyjanavańnia savieckaj pamiežnaj achovy, jakaja dvaccać hod niesła słužbu na «miažy cyvilizacyj». I tut čytača čakaje šmat novych materyjałaŭ. Asablivuju cikavaść ujaŭlajuć małaviadomyja fakty z historyi Minskaha ŭmacavanaha rajona Čyrvonaj Armii, jaki ŭzvodziŭsia ŭ pačatku 1930-ch hadoŭ u niepasrednaj blizkaści da linii miažy na vypadak vajny z Druhoj Rečču Paspalitaj.
Treciaja hłava pryśviečanaja dałučeńniu Zachodniaj Biełarusi da BSSR u vieraśni 1939 hoda i ŭdziełu ŭ hetym pracesie savieckich pamiežnikaŭ. Jak viadoma, paśla ŭźjadnańnia dźviuch častak Biełarusi byłaja saviecka-polskaja miaža praisnavała da červienia 1941 hoda ŭ jakaści «Zony zaharody».
Narešcie, čaćviortaja hłava knihi pryśviečanaja padziejam červienia 1941 hoda, a mienavita abaronie, jakuju sprabavali arhanizavać savieckija pamiežniki, čyrvonaarmiecy i bajcy Minskaha ŭmacavanaha rajona na linii davajennaj miažy. Na staronkach knihi čytačy ŭbačać šmatlikija fotazdymki, zroblenyja niamieckimi žaŭnierami na miescach bajoŭ la DAKaŭ pad Minskam. Darečy, vialikaja ŭvaha ŭ knizie taksama nadadzienaja apisańniu trahiedyi horada na Śvisłačy ŭ červieni 1941 hoda.
Prezientacyja knihi «Miaža była pad Minskam 1921-1941 hh.» adbudziecca 3 kastryčnika 2017 hoda ŭ 19-00 u Halerei TUT.BY (h. Minsk, pr-t Dziaržynskaha, 57). Uvachod volny.
